Shillong, Nailur 03: U Lat ka jylla u Chandrashekhar H. Vijayashankar mynta ka sngi u leit ban jngoh ia ka Khasi Heritage Village kaba don ha Mawphlang kaba la pynbit pynbiang da ka Khasi Hills Autonomous District Council ryngkat ha hima Mawphlang ban sngewthuh ia ki riti dustur jong ka jaidbynriew Khasi.
Haba kren ha kane ka jnglei jngoh ia katei ka jaka u Lat ka jylla u la ong ba, ki jaidbriew Adivasi ki dei ki briew kiba ieit bha ban pynneh pynsah ia ki khlaw, kin juh pynjulor ia ki khlaw bad ki hika kumno ban im bad ka mariang.
U Lat la ong ba u dei na Karnataka bad katta na Mysore bad ka kurim jong u dei na Kur, la ong ba un sa ialam ia ki sha katei ka jaka namar ki long kum juh kumba long shane khlem don jingiapher ei ei ruh em naduh ka bam baroh la long kum juh.
“U Lat la ong ba namar u dei na Mysore ka long kaba eh ban ong ba kan don ka jaka kaban kham itynnad ka Mysore, hynrei ha dien ba u la wan sha Meghalaya u hap ban pdiang ia ka jingshisha ba ka jylla Meghalaya ka dei ka beng, ngi im shisha ha bneng” u la ong.
Haba phai sha ki dawai kynbat u Lat ka jylla u la ong ba namar ba u la bat kumu myntri ka tnad khlaw ka jylla Karnataka u la ong ba u tip ia ka jingkordor jong ka khlaw, ha ka por ba u long MP ruh u la kyrpad ia u Purno A Sangma kum u speaker ban buh ia u ha ka Standing Committee jong ka Parliamentary ba dei bad ka khlaw.
Haba ia dei bad ki dawai kynbat nga la pule ia ka history ha ka Ri India, haba ia kren ia ki dawai kynbat ka bynta kaba nyngkong ka juh long ka jylla Meghalaya, ha ka dien ka jylla Meghalaya ka leit sha ki Western Ghat jong ka Ri India, dei ha kane ka rukom hap ban pyrkhat bha ban pynneh ia ka mariang ha kane ka jylla.
Haba phai sha ka synshar paidbah u Lat ka jylla la ong ba hangne ka don shisha kata ka synsahr paidbah ba kumno kumba la kren kala iaid mynta palat 700 snem, kane ka dei shisha kata ka synshar paidbah bad kane ka dang iai bteng phi dei ban pynneh pynsah ia kane kaba ki longshuwa kila buh ryntih.
Ha kane ka sngi u Lat ka jylla la leit ban rung ban jngoh ia ka Lawkyntang ha kaba kila don ki nongbatai ban pynsngewthuh ia u Lat ka jylla ha kaba ia dei bad ka jinglong kyrpang katei ka khlaw kaba don haduh 78 ne 80 hektar ka jingiar ka jong ka, ha kaba u la shahskhor bha ia ka jingbtai.
U Chief Executive Member jong ka KHADC bah Pyniaid Sing Syiem la ong ba la khot ia u lat ka jylla sha kane ka jaka ka long ba un lat u sngewthuh ia ka jinglong ki riti ki dustur jong ka jaid bynriew khasi, ha kane ka Khasi Heritage Vilalge la trei iaki iing jong ki hima na ki 54 tylli ki hima la lah ban shna tang 13 tylli ki hima.
