Shillong, Nailur 20: Ka Meghalaya Editors’ and Publishers’ Association (MEPA) ka pynrem jur ia ka jingjia kaba la jia mynta ka sngi (20 tarik Nailur, 2021) ha kaba u nongthohkhubor uba la rangbah u E M Jose u la shah ktah kti ha ki katto katne ki riewshim kabu ha ka jingialang kaba la pynlong da ki seng bhalang ha u Mot Kiang Nangbah ha Barik, Shillong.
Wat la ki dkhot bad nongialam sengbhalang kiba la panmab halor kane ka jingjia, ka MEPA ka kyntu ia ki ban thwet kum ia kine ki riewshimkabu kiba donkti ha kane ka jingjia bad ban pynshitom ia ki khnang ba kum kine ki jingjia kin ym jia shuh hadien habud.
Ka MEPA ka pynkynmaw ruh ba ki lad pathai khubor ki don ka bynta kaba khraw kumba long lem ki kynhun bapher bapher na ka bynta ban pynsngew ia ka sur jong u paidbah jong ka jylla. Kane ka long katkum ka kyrowoh kaba la phah da u President bad bah John W. Thabah general secretary ka MEPA.
