Shillong, Nailur 07: Ka Mynken Christian Higher Secondary School kaba na Ri-Bhoi District kaba la mihkhmat ïa ka Meghalaya sha ka lympung U-17 boys’ Subroto Cup 2024 ha nongbah New Delhi.
Kala pynthikna ïalade ban jam sha ka wat ïakhun semi final hadien ba ka la pynliem noh da 3-1 kol ïa ka Council for the Indian School Certificate Examinations ba la mihkhmat da ka Minerva Public School -Mohali ha ka Quarter final ha Tejas Football Ground.
Ka jingïalehkai kaba la long mynta ka sngi ka 7 tarik u Nailur 2024 Ka namtam ha kane ka jingïalehkai ka long sha u Banganson Nongkhlaw u ba la khyrwit da ka hat-trick (27, 40, 50 minit) ban btin lynti ïa ka Meghalaya sha ka semifinal ha kane ka U-17 boys’ Subroto Cup 2024.
Ka jingïakhun hapdeng kine ki ar kynhun ka la sdang naduh ka por 8:30 baje mynstep. U Banganson u la ïoh ban buh hakhmat ïa ka kynhun tang hadien marshiteng ba la ïaid ka por ha ka kylla step.
Kane ka kol ka la urlong lyngba ka bol kaba la pashat thikna na liang kadiang, ha kaba u la lah ban tehlakam ïa ka bol da ka shadem, bad u la lah ban pyllait lyngba u wei na ki bak ka liang pyrshah shuwa ban pynkhih jlang ïa ka bol shapoh kol.
Ka kol kaba ar ka la jia tang hadien katto katne minit ba la sdang ïa ka kylla miet, ha kaba u Banganson u la lah ban pyndei tiak da ka khlieh ban pynkhih ïa ka kol kaba ar na bynta ka Meghalaya.
Katba ka kol kaba lai ka dei kaba la shu jia kyndit kyndit, hadien ba ka jingpyrshang ban pynkhihjar na u wei na ki paralok ba ïalehkai ryngkat ka la lait sharud hynrei donbok ba ka bol ka la poi ha u Banganson bad khlem da pynsepei u la pynkhih ïa ka kol ban kynjoh syndon ïa ka hat trick.
Kumba katto katne por, ka CISCE ka la ïoh ban pynphai shi kol lyngba u Hemneichung, hynrei ki lai kol na u Banganson ki la long palat ïa kane ka kynhun ban wanphai.
Kumban shu pynkynmaw, ka Meghlaya ka la long ka lahduh jong ka Group F da kaba jop baroh lai sien lynter ki jingïalehkai pyrshah ïa ka Bihar, Chandigarh bad ka Dadra bad Nagar Haveli and Daman bad Diu, bad ha ka Group stage ka la ïoh ban pynkhihjar haduh 29 kol baroh.
Kumta da kane ka namjop ka kynhun jong ka jylla kan pynkhreh ban aireng pyrshah ïa ka Arunachal Pradesh- ba la mihkhmat da ka Govt. Secondary School, Monigong ha ka semi final kaba nyngkong ha ka Lah Sngi U Blei (09 tarik Nailur, 2024). Kiwei pat ki kynhun ba rung semi final ki long ka Sri Lanka Schools Football Association bad ka T.G English School, Bishnupur, Manipur.
