Shillong, Lber 04: U myntri rangbah ka jylla u Conrad K Sangma haba jubab ia ka jingkylli u bah Adelbert Nongrum la ong ba ka Northeast Frontier Railway ha ka 17/12/2024 ka la phah da ka shithi sha ka sorkar jylla ba lada ym lah ban pynioh jaka ban shna ia ka lynti rel ka sorkar jylla ka dei ban pynphai noh ia ka pisa T.209.36/- klur tyngka.
U myntri rangbah u la ong ba kane ka pisa ka don ha ophis Deputy Commissioner ka Ri Bhoi District, kane ka pisa kaba la ai ha u snem 2017 ka dei ban siew ia ka bai khyndew lada ioh na ka bynta ban shna ia ka lynti rel hynrei namar bym ioh jaka kane ka pisa ka sah kumba ka long ha ophis DC ka Ri Bhoi District.
U myntri rangbah u la ong ba ka jingbym lah ban ioh ia ka jaka ka dei na ka daw jong ka jingpyrshah ban wanrah ia lynti rel, la ka dei ka rel ban kit mar ne ka rel ban kit briew na ka liang jong ka sorkar kala ia kren bunsien ia kane ka phang hynrei kam shym la lah ban pynurlong.
Na ka liang jong u myntri rangbah u la pynsngew ba kum ka sorkar ka don ka jingpyrkhat lada ka don ka lynti rel , khamtam ka rel ban kit ia ki mar ki mata, ki tiar ki tar kan iarap shibun ban pynsuk bad ban pynioh ia ki tiar ki tar ha ka dor ba kham duna ,namar kumba ka long mynta la shu wan kit da ki trok na Guwahati na Assam.
