Shillong, Nailur 02: Ka North Eastern Council, ha ka jingiatreilang bad ka B-School Incubator IIM Calcutta Innovation Park, ka la sdang ia ka North East Entrepreneurship Development Programme (NEEDP) kaba nyngkong duh mynta ka sngi hangne ha NEC Secretariat, Nongrim Hillsha Shillong.
Ia kane la ithuh kum ka sienjam kaba nyngkong kaba kdup lang ia kito kiba dei ban ioh jingmyntoi na baroh 8 tylli ki jylla ka thain bad kane ka sienjam ka thmu ban lap bad pynkupbor ia 270 ngut ki nongseng kam lajong na ka thain shatei lam mihngi lyngba ki prokram kiba btin kti ia ki ha ki por ba dang sdang ia ka kam bad hadien ba la sdang ia ka kam.
Ia ka program NEEDP la pyllait paidbah da u Secretary ka NEC, u K. Moses Chalai, IAS. La iadon lang ruh ki ophisar na ka North Eastern Council bad ki nongmihkhmat na ka IIM Calcutta Innovation Park, uPranjalKonwar, COO, IIMCIP, uRajarshiSarma, Program Head, NEEDP & Flo Oberhofer.
U Program Head, Prime Hub Meghalaya ruh u la iadonlang ha kane ka sngi. Ka R. Lalrodingi, Advisor, BIT ka la ai jingbatai bniah shaphang kane ka program.
Ha ka jingkren jong u, u K. Moses Chalaiu la ong ba ka long kaba donkam bha ban wanrah ia ka jingsaindur thymmai bad ka teknoloji ha ki startup bad ki kam khaii baritbaria khnang ban kyntiew ia ki. U la ong ruh ba u sngewthuhbha ba yn sa don ki startup kiba long kiba jop bad ruh ki unicorn na ka thain shateilammihngi.
“Kane ka thain ka don shibun ki samla kiba don sap bad ka jingstad jong ki, ka ai mynsiembeit. Ka jingplie lad plie lynti bad ka jingai ia ki rynsan kan wanrah ia ka lawei kaba shai ia ki bad kan kyntiew ruh ia ka ioh ka kot jong ka thain shateilammihngi,” u la bynrap.
La pliepaidbah ruh ia ka bynta kaba nyngkong jong kane ka sienjam, ka NE Entrepreneurship Challenge (Hunt) ha kane ka sngi. Kane ka dei ka jingkyllumlang ia ki sienjam bapher bapher kiba thmu ban shem ia 270 tylli ki jingthmu startup kiba biang tam na ka thain.
Kane kan kut ha ka Reward and Recognition Summit, ha kaba ki 270 tylli ki startup kiba shah jied kin ioh ia ka song pisa, ki certificate bad ka jingpynrung hapoh ki prokram Incubation bad Pre-Incubation.
Ka prokram Pre-Incubation ka thmu ban ialam lynti ia 150 tylli ki jingpyrkhat / jingsaindur ia ki startup khnang ba kin don ka rukom treikam kaba don lut ki bynta kiba donkam ban long ka kam kaba jop bad kaba iohnong. Man na kine kin ioh ruh ia ka prototype grant kaba T. 1 lak, bad ki 25 tylli kiba lah ban treikam kham bha kin ioh shuh shuh sa T. 4 lakshuwa ban kut ka prokram pre-incubation.
Ia ka prokram Incubation yn pyniaid lang ha kajuh ka rukom ia ki 120 tylli ki startup kiba don ka Proof of Concept lane ka jingkamai. Kane ka prokram ka thmu ban pynskhemia ka jingsngewthuh ki startup ia ki kam kiba iadei bad ka kam khaii bad ban iarap ia ki ban kyntiew bad pyniaid iew ia ki kam. Kine ki startup kin ioh man T. 3 lak kum ka commercialization grant, bad ki 20 tylli kiba trei kham bha kin ioh shuh shuh sa T. 7 lak haba kut ka prokram.
Ka jingshongshit ha ki kam startup ba seng dalade ka la sdang kiew ha kane ka thain ha kine ki 5 snem ba la dep. Ka thain ka la iohi ia ki lad kiba bun ha ki kam lajong kiba lah ban pynbeit ia ki jingeh kiba bun kiba kynthup ruh ka jingbym ioh kam bad ka jingduna ka jingiohi ka ri baroh kawei ia ka kolshor bad ki jingdon jingem jong ka thain.
Katba ki la don ki sienjam ban kyntiew ia ka jingseng kam lajong ha ki jylla da ki sorkar jylla, kane ka dei ka sien kaba nyngkong ba la sdang ia ka prokram kaba heh haduh katne na ka bynta ki nongseng kam lajong ha baroh kawei ka thain shateilammihngi.
Namar ka jingheh bad ka jingiar jong kane ka sienjam, la kyrmen ba ka North East Entrepreneurship Development Programmekan long ka jingiarap kaba khraw ban wanrah ia ki nongsengkam lajong ba thymmai bad ka jingpynkhlain ia ka jingseng kam lajong ha ka thain.
