Shillong, Nohprah 04: Ka jingiatreilang ha pdeng ka Congress bad ka National Peoples’ Party ha KHADC shen kan sa kut noh namar ki ar ngut ki MDC u bah Pynshangian Syiem bad u bah Ronnie V Lyngdoh kin sa wengnoh ka jingkyrshan jong ki ia ka executive committee.
Ka jingdon ki MDC ha ka liang synshar kaba la ialam da u bah Pyniaid Sing Syiem na ka party NPP ki long 22 ngut lada ka Congress kaba don ar ngut ki MDC lada kim mih na ka Executive Committee kan nym ktah ei ei ia ka EC.
Ki lad khubor ki iathuh ba namar kala jur palat ka jingdawa na ki nongkyrshan ka party congress ba ki ar ngut kiMDC jong ka party ba kin weng noh na ka jingiatreilang bad ka NPP ha KHADC bad ka jingdawa ba ki dei ban wengnoh mardor.
Kane jingdawa kala jur bha ia ki ar ngut ki MDC ba ki dei ban weng noh na ka jingiatreilang bad ka NPP ha kine ki lai bnai bad ka jingdawa kam dei shuh tang hapoh ka MPCC kane ka jingdawa kala poi sha ki skhor jong ka AICC.
Man ba ki nongialam ka AICC ki wan sha Meghalaya ka jingdawa ka long ba ka party ka dei ban bthah ia ki ar ngut ki MDC ha KHADC ba kin weng noh ia ka jingiatreilang bad ka NPP, kaba u bah PN Syeim u bat kum u Deputy CEM bad u bah Ronnie V Lyngdoh shu long kum u MDC.
Ha ka iing dorbar kaba 30 ngut mynta ka jingdon ki MDC ha KHADC ki long 28 ngut, ka NPP ka don 19 ngut, ka UDP san ngut, Congress 2 ngut, HSPDP 1, Dkhot marwei 1, lada ka congress ka wengnoh ia ka jingiatreilang ka EC kaba la ialam da u bah Pyniaid kan dang neh.
