Shillong, Naitung 06: U President ka United Democratic Party (UDP) u bah Metbah Lyngdoh ha ka jingialam ban pdiang ia u Dr. Aman War kum u dkhot ba pura jong ka party ha ka jingialang ha Khasi National Dorbar Hall, ha Mawkhar la ong ba ka party kan jop palat 30 tylli ki konstitwensi.
Haba kren ha kane ka jingialang ha kaba da ki spah ngut ki nongkyrshan ka UDP kila ia poi lang ban sakhi ia kane ka sngi ha kaba ka party kala pynbna ba u Dr Aman un long u kyrtong ka party ban ia khun ia ka MLA elekshon 2023, u la kyntu ia ki nongkit kam ba kim dei ban khein shngian ha ka sain pyrthei.
U bah Metbah la ong ba kane kam pat dei ka por ban ialap elekhson, hynrei u la kyntu ia ki nongalam ka party ba kin ia trei lang da ka jingsngewthuh jingmut , ban jop don kam ia ka jingiatreilang bad ym dei ban ia shrud para nongialam, namar ia ki kam jong ki shnong ki thaw dei ki shnat kiba kham tip bha, kiwei ki don kam ban ia ai mynsiem.
Ha kane ka sng u President ka party u la ong ba kala don ka jingiakren kaba shai bad ki MLA ki ban wan na kiwei ki party ban ia khun na ka party UDP ha ka elekshon MLA 2023, da la biang ka por kin sa pynbna bad ai ba na Mawkhar kan her bad sawa ka sur jong ka UDP sha duh Garo Hills.
Ha ka jingkren u Dr. Aman War u la ong ba ka jingwan jong u sha ka sain pyrthei ka lon ba u don ia ka jingsngewkhia bad ka jingkitkhlieh wat la u la dap 58 snem hynrei u dang sngew kumba 27 lane 28 snem bad u kwah ban wanrah ia ka synshar khaddar kaba bit ba biang.
U la ong ba ha ka jingpyrkhat ki don kiba pyrkhat jyndong bad kiba pyrkhat jyliew hynrei kine baroh ar ki don la ka jong ka nongrim, la ong ba kumba ka long mynta kumne dei ka jingtrei shitom jong ki shnat ka party ha ki shnong ki thaw, la jied ia kane ka sngi ban rung sha ka party UDP ka long ba dei ha kane ka sngi 6th Naitung 1960 la seng ia ka seng riewlum kaba nyngkong ka APHLC.
Kiwei kiba la kren ha kane ka sngi ki long u Dr. Jemino Mawthoh general secretary ka party, u bah Kyrmen Shylla, ia ka jingialang la pyniaid da u bah Paul Lyngdoh Working President ka party, kiba la ia don lang na ka party u bah Titosstarwell Chyne CEM jong KHADC, ki MLA bad ki MDC ka party. Ha kane ka sngi la plie ruh ia ka ophis trei kam ka party UDP, ha ka jingiaskhi lang ki nongkyrshan ka party.
