Shillong, Lber 11: Mynta ka sngi ki Seng bhalang bapher bapher hapoh ka lama CoMSO kila pynlong ia ka jingialang paidbah ha Motphran ban pynpaw ia ka jingialong kawei bad ki jaitbynriew Achik ban ialeh pyrshah ia ki mynder ri kiba la wan ban pyni bor ia ki paidbah garo ha Garo Hills.
Ha kane ka jingialang u shongknor jong ka CoMSO u bah Roikupar Synrem u ba dei u president ka HYC haba kren ha kane ka jingialang u la pynpaw ba kum ka jaitbynriew hynniew trep ka don ryngkat bad ki jaitbynriew garo ha kane ka jingialeh pyrshah ia ki mynder ri ban pyntikna ba ki dei ban mih na Garo Hills.
Ha kane ka jingkren u shongknor ka CoMSO u la ong ba u myntri rangbah ka jylla u Conrad K. Sangma u dei ruh ban sngew ia ka sur jong ka jaitbynriew Khasi,Jaintia bad Garo ba kin nym shah ban die ia ki jaka sha ki bar ri ia ki jaka ha Garo Hills sha ki mynder ri kane ka jingiadon lang hangne ka long ka dak ban pynpaw ba ki don ia ka jingiatylli, ba ki ieng ryngkat ha kum kane ka jingjia.
U la ong ha kane ka sngi u nongialam ka CoMSO ba une u rangbah um dei ban klet ba u poi ha ka kyrdan myntri rangbah ka jylla ka dei namar ba ki paidbah garo kila ai ia ka jingshaniah ia u bad lada ki kwah kin pynhiar ruh ia u na ka shuki myntri rangbah ha u snem 2028.
U bah Roikupar u la ong ba u myntri rangbah u dang don lai snem ka por ban pyntikna ba ia ka hok jong ki paidbah garo ban pynioh ia ka jingiada, ia ka khyndew ka shyiap, ki riti ki dustur bad ban pyntikna ba kine ki briew kiba wan rung beain na Bangladesh ki dei ban thwet ia ki bad beh syndon ia ki sha ka jaka kaba ki wan.
