Shillong, Jylliew 09: Ka Khasi Jaintia Fish Wholesaler and Retailer Association (KJFWRA), ha ka jingialang ba kyrkih mynne mynstep ha kaba la mih kawei ka sur. Ba ka la dawa ia ka Deputy Commissioner Kong R.M. Kurbah ba kan pynshai mynno bad hangno ba ka Tnad ka phah leh Test, ban pynthikna ba ki dohkha ba wanrah nabar ka jylla ki dei kiba injek formalin.
Kat kum ka hukum, ka Commissioner of Food Safety ka la ong, ka jingtip ka la poi sha ka Ophis jong ka Commissioner of Food Safety ba na ki 40 tylli ki dohkha ba la leh test, haduh 30 tylli ki dei kiba la test positive ba injek ia ka dawai formalin.
Ka ong ba kane ka long kat kum ka analysis report jong ka Assistant Food Analyst ka Sorkar Jylla kat kum ka Report ba mih mynha ha ka 6 tarik Jylliew, ba ong ba ka jing injek Formalin ka dei kaba long bih kaba khlain bor bad ba ktah jur ia ka koit ka khiah.
Ka Commissioner ka la ong ba ka jingkhaii, jingbuh bad jingdie ia ki dohkha ba la injek da ka formalin lane kino kino ki dawai ba iada ia ka jingpyut, ka dei ka bym shngain satia ia ka koit ka khiah kat kum ka kyndon.
Halor kane, la khang ban shalan bad die ia ka dokha ba wanrah nabar ka Jylla 15 sngi ha ka Jylla bad buh kyndon ruh ba kiba ialeh pyrshah kin ngat ha ka jingpynsajia ba 7 snem ha phatok bad ka kumba T. 10 lak ka fine.
Ka KJFWRA ka dawa ia ka Commission of Food Safety ba kan pynshai naei ba ki ioh ban test ia kita ki dohkha kiba lap formalin.
Kane ka seng ka la kdew ba ki dohkha kiba wan sha Jylla ki dei kiba wan na kylleng ki kompani na Andhra Pradesh bad ia kine ki dohkha la ioh syrnot ruh na ka Sorkar Andhra Pradesh ba pynshisha ba kim dei satia kiba la injek formalin.
Kumta u bah C Wankhar u ba dei uwei na u EC member u la pynpaw ba ka Seng bad ki nongdie dohkha ki la rai ban leit iakynduh ia ka Commissioner of Food Safety mynta ka sngi ban ioh ia ka jingshai kaba bniah bad kaei ka rai kaba mih nangta kin sa iai peit kaba donkam kaei ban leh. Namar ki ruh hi ki kwah hi na ka bynta ka jingbha ka bit ka biang jong u paitbah.
