Shillong, Iaiong 13: Ka shad Suk Mynsiem 2026 kaba lai sngi kaba la pynlog ha madan Weiking kala kut mynta ka sngi ha kaba palat hajar ngut ki nongshad na kylleng kilum khasi, ki thei bad ki rang kila wan ban ia shim bynta ia kaba la pynkut mynta ka sngi ka 13/Iaiong/2026.
U Rangbah Rangpher Rynjah wei na ki riew dkhot jong ka Seng Khasi Kmie la ong ba ka shad Suk Mynsiem kala don naduh mynshuwa hynrei da ka jingwan synshar ki kharlieh khariong kila pyrshang ban pynduh, dei ha u snem 1911 bala kham long ryntih ia kaba la pynlong ha madan Weiking.
Ia kane ka shad la juh pynlong ha bnai Pyrem kaba juh long lai sngi, ka sngi sdang ki ong ka sngi noh kjat, ka sngi kaba ar bad la pynkut ha ka sngi kaba lai, kane ka dei ka jingshad ainguh ia u blei trai kynrad nognbuh nongthaw ba ka bynta ki jingkykhu bala thehsei ha ki saw aiom.
Ka seng khasi ka dei ka seng ban pynneh pynsah ia ki riti dustur, ka rwai ka siaw, ka shad ka kmen bad kaba sngewtynnad ka long ba ha kine ki sngi kiba mynta ki nongiashim bynta kila dang kham bun bad dang shitryhem namar kila sdang ban sngewthuh ia ka jingkotdor naduh ki samla haduh ki hep rit.
U Rangbah D L Nongbri u wei na ki Vice President ka Seng Khasi Kmie Mawkhar la ong ba kaba kham kongsan ka long ba bun ki samla bad ki hep rit kila wan ban ia shim bynta naduh ka sngi noh kjat bad ka phang kaba kongsan ka long ieid iala ka jong burom ia jong kiwei.
Mynshwa ki nongtem nongpud ki don tang ki riew rangbah hynrei mynta ki dang ki samla kiba la nang ban tem khamtam ia ka tangmuri kaba dei kaba eh tam ban tem hynrei mynta ki khun samla kila ia nang ban tem namar ha ka shad Suk Mynsiem ki don hynniew tylli ki skit kane ka shad kam dei ka shad rong hynewi ka dei ka shad niam ka da don da ka duwai ka phirat bad ka siang kaphor.
U Rangbah PD Nongrum wei na ki Vice President ka Seng Kmie Mawkhar la ong ba kane kam dei ka shad sngewbha, ha shuwa ban sei ia ki tiar shad ka Ksair ka Rupa ka don ka lehniam leh rukom ka nguh ka dem kine kiba la leh naduh hyndai bad la hikai ban ri sumar.
U Rangbah Nongrum u la ong ba dei ban pyneh iala ka riti ka dustur, pynneh iala ka jong ka niam,namar da duh noh ia ka riti ka dustur ka niam haei shuh kata ka jinglong kyrpang kum ka jaidbynriew.
Ka jingkhublei ka leit ruh sha ka sorkar kaba juh kyrshan na ka por sha ka bor ban kyntiew ban pyneh pynsah ia ka riti dustur, ha kane ka sngi kut la wan ban sakhi lang da u myntri ka tand pynneh riti dustur u bah Sanbor Shullai.
