Shillong, Kyllalyngkot 03: u Bah Hiamdor Rapsang synbut rangbah shnong ka shnong Mawsynram la ong ba ka dorbar shnong ka ieng skhem halor ka nongrim ba ka Mawjymbuin kam dei ka jaka mane blei jong kano kano kynhunniam ka dei kaba la pymnlong hi ia ka krem da u blei nongbuh nongthaw.
Haba kren ha ki lat pathai khubor ha dien bala kut ka jingialang bad ka Deputy Commissioner kaba la long mynta ka sngi ha ophis jong ka u la ong ba kam shym don ka jingkhang iano ianor ruh ban leit ban jngoh ia ka krem Mawjymbuin naduh ka por 9.00 baje mynstep haduh ka por 5.00 baje mynmiet.
Na ka liang ka dorbar shnong kam shah iano iano ban pynlong ia ka jinglehniam ne da kano kano ka kynhun niam hapoh kane ka krem namar kam dei ka jaka leh niam hynrei ka dei tang ka jaka jngohkai pyrthei.
Haka juh ka por u President ka Kutumba Suraksha Parishad (KSP) na Assam u Satya Ranjan Bora haba kren haki lat pathai khubor u la ong ba la shah ia baroh ban leit sha ka krem Mawjymbuin kam shym don katta ka jingkhang baroh ki lah ban leit baroh 365 sngi lynter naduh ka por 9.00 baje mynstep haduh 5.00 baje jan miet ha kaba ki sap ban but ia ki katto kattne ki kyndon.
Na ka liang jong ka KSP kala pdiang ia ki kyndon bad la ong ban sa buh ia ki jingpynkhreh ba kyrpang bad kata ka long ba ki lah ban leit ha katei ka jaka kin shong bad pyndep ia ka jingmane blei bad ia katta la lah ban leh kumba ka long mynta ka jingiakren halor ka krem Mawjymbuin kala kut.
Ki don ka jingshaniah ha ki nongialam ka jylla Meghalaya bad ha ki bor jong ki District Administration kumno ki leh bad ki dang peit ia katta, ka jingkren na wei riew shimet , ha ka jingiakren ki bor jong ka District Adminstration bad bor shnong ki ong kam don ka jingkhang namar ka plie naduh 9.00 baje mynstep haduh 5.00 baje jan miet.
La ong ba ka Ri India ka dei ka ri ba don ia ka jinglaitluid niam kumta hap ban ia burom mar kylliang ia baroh ki jaidniam bad ki jaidbynriew kumta hap ban ia burom mar kylliang la ka dei ha iing mane ne hapoh ki Temple bad kaei kaba kileh dei ban burom ia ka riti synshar jong ka Ri India.
