Shillong, Lber 31: Mynta ka sngi 31/Lber/2026 ka seng Meghalaya Swimming Association kala pynkup burom ia ki arngut ki nongjngi kiba la wan rah burom ia ka jylla ha kaba kila ioh iaki takma rynong ha ka jingiakop jngi ha ka Asmita Women Swimming League East Zone kaba la long ha Guwahati bad ha ka 1st India Khelo Games 2026 kaba la long ha Chhattisgarh.
Ki arngut kiba la shah pynkup burom haka MSA ki long ka samla Pdiangsuklang Syngwan kaba dei na ka shnong Shella kaba la wan ba lai ha kaba iakop jngi kaba 50 mtr ha ka Women Swimming League East Zone kaba la long ha Guwahati ha ka 21/Lber/2026.
Ka samla Verem Gedaliah Nongsiej ka la wan ba lai ha ka jingiakop jngi kaba 50 mtr ha ka 1st India Khelo Games 2026 kaba la long ha Chhattisgarh ia kine baroh arngut la ai jinghikai da u nonghikai Laitonjam Santosh.
Ia kane ka jingpynkup burom ia kine ki arngut ki thei samla kiba la long kiba nyngkong haka jylla ban ioh takma ha ka jingiakop jngi ha ka ri, la pynlong ha Cronoline Swimming Pool Shillong haka jingiadon ryngkat lang ki ba haiing ba hasem bad ki nongialam ka seng.
