Shillong, Rymphang 23: U Myntri ba dei peit ia ki kam jngohkai pyrthei u Timothy D. Shira haba jubab ia ki jingkylli ba la wanrah da u bah H.S Kharpran u la ong ba ka dei ka jingshisha ba ki la leh ia ka jingjurip haba ia dei bad ki shnong da ka Tourist Spot Assessment Survey.
Ka jingshim ia ka jingkhein kino ki shnong kiba lah ban ioh ia ka jingiarap ban buh ia ka iing basa ka shong ha ka jingdon ki jaka jngoh kai pyrthei, kum ka Sohra, Mawsynram, Dawki kine ki jaka ba khring ia ki nongwan jngoh kai pyrthei.
Haba jubab ia ka jingkylli bynrap da u myntri rangbah ka jylla u Conrad K.Sangma u la iathuh ba ha kane ka jingjurip ia ki shnong ki thaw ha ka jylla baroh kawei la shim kyllum ia ki 43 tylli ki dong bad ha kine ki 43 tylli ki dong ki don 245 tylli ki shnong bad haduh mynta ka sorkar ka la mang pisa na ka bynta 877 tylli ki iing basa.
Haba ia dei bad ki jingkylli kiba ki samla kiba apply bad ba la mang lyngba ka skhim PMEGP ka don ka jingshisha ba ki ia kynduh ia ki jingeh dei na kane ka daw ba ka sorkar ka la wanrah da kawei ka rukom pyntrei kam ban pynsted ia ka jingiarap kaba dei lyngba ka sorkar jylla.
Kito ki samla kiba la ioh ia ka PMEGP lada kim pat shim ia ka pisa ban sdang ia ka kam ki lah ban sangeh noh ia kane ka skhim bad kin wan noh ban shim na ka skhim jong ka sorkar jylla ha kaba ka sorkar ka ai T.10 lak tyngka T.7 lak tyngka ka dei ka Grant bad T.3 lak tyngka ka ram.
