Shillong,Rymphang 17: U Myntri ba dei peit ia ka pule puthi u bah Lahkmen Rymbui haba jubab ia ka jingkylli u Dr.Mizanur Kazia u la ong hooid ka sorkar ka la shim ia ki lad ki lynti haba ia dei bad ka jingiarap pisa ban siew ia ka tulop ban nym pynslem ka sorkar ka la pynkhreh ia ka Meghalaya School Information Management System ban weng ia ka jingeh haba ia dei bad ka jingsiew ia ki nonghikai.
Haba ia dei bad ki nonghikai skul ha ki skul sorkar kam juh don kata ka jingpynslem Ia ka tulop kumjuh ruh ia kiba hikai Deficit, ka jingslem ka dei tang na ka bynta ki nonghikai Adhoc kaba ka sorkar ka ai jingiarap sha ki skul kum ka grant ba kiba pyniaid ha ki skul kin siew pat sha ki nonghikai kiba hikai ha kito ki skul.
Ka dei ka jingshisha ba ka sorkar ka la shim ia ka rai ban pynwandur thymmai ia ka jingiarap sha ki skul Adhoc bad ia kane ka sorkar kala pynmih ia ka jingpynbna sorkar ha ka 12 Rymphang 2026 ia ka rukom iarap sha ki skul ia ki nonghikai bad kane ka jingiarap kan sdang treikam naduh ka 1tarik Iaiong 2026.
Ban kham pynshai shuh haba iadei ia kane ka jingai jingiarap sha ki skul Adhoc u myntri Rangbah u la kren shai ba ka sorkar kam juh siew tulop sha ki skul Adhoc namar ia ki la pyniaid da ki riew shimet, ki kynhun ne ki seng niam kaei kaba ka sorkar ka ai ka dei ka grant dei na kane ka daw ym shym la pyndonkam ia ka kyntien tulop.
Ka sorkar haba ka shim ia ka rai ban iarap ka long ba ka don ka jingsngew khia na ka bynta ki nonghikai kiba mad ia ki jingeh ka jong ki bad ban poi sha kane ka thong ban pynbha ia ka jingai jingiarap ka la shim por palat snem dei hadien ba la iamir jingmut ka sorkar kala shim ia ka rai ban kyntiew noh ia ka jingiarap,baroh shi katta ka sorkar ka pynlut T.600 klur na ka bynta ki nonghikai Adhoc bad da kane ka rai ka jinglut mynta kan kot sha ka T.815 klur ha ka shi snem na ka bynta ki skul Adhoc.
