Shillong, Iaiong 11: U Symbud Myntri Rangbah ka sorkar jylla ba dei peit ki kam pohiing (Police) u bah Prestone Tynsong ha ka sngi Thohdieng, ula ong ba ka Sorkar kam shym la pynbor satia ia ki paidbah ba kin pynrung kyrteng Aadhaar.
Haba kynthoh ia ka jingiakhih ka Awaken India Movement (AIM) pyrshah ia ka jingpyniasoh Aadhaar, u bah Prestone ula ong u la iohi ia ki katto katne kibriew kiba pyrshah. Ngam lah ban ong eiei ia ki.
Hynrei lada ki kwah ban ioh ia ki jingmyntoi ba la ai da ka Sorkar, la ka dei ba ai ka Sorkar Pdeng ne Sorkar Jylla, ka shong ha ki. kim lah ban pynbor ia ki ban pynrung kyrteng Aadhaar lada ki sngew ba kam long kaba donkam ia ki.
U symbud rangbah u la pynpaw ba kane ka kam, ka dei ka mat kaba la slem bha, u Symbud Myntri Rangbah ula ong ba ki paidbah hi da lade mynta ki la sdang ban leit pynurng kyrteng Aadhaar.
U la ong, haba nyngkong ki paidbah ki la pyrshah jur bha ia ka Aadhaar card hynrei u la ong ba dang khyndiat por mynta ki paidbah da lade ki la leit ban pynrung kyrteng ha ki jaka kiba la buh ban ioh ia u Aadhaar card.
U la ong ba kane ka long namar wat haba leit rung klas ha kino kino ki jaka pule la donkam ia u Aadhaar card ban ioh ia ki marbam rashon, phi donkam ia ka Aadhaar card wat ban ioh ia ki health insurance bad kiwei kiwei. Kat ki kam mynta ki donkam beit ia u Aadhaar.
