Shillong, Risaw 15: U Myntri ba deipeit ia ka tand puleputhi u la iathuh ba ka sorkar pdeng kala pynduna ia ka jingbei pisa da 5% ia ki nonghikai SSA naduh u snem 2018 ia kaba duna la hap sei na ka sorkar jylla.
Haba kren ha ki lat pathai khubor mynta ka sngi, u myntri ka tnad pule u Rakkam A Sangma la pynshai ba shuwa u snem 2018 ka skhim SSA ka dei ka jong ka sorkar pdeng ha kaba ia jingbei pisa ka long 90% na ka sorkar pdeng bad 10% na ka sorkar jylla.
Hynrei naduh u snem 2018 ka sorkar India kala pyndun noh da 5% ka jingbei pisa man la u snem bad mynta u snem 2024 ka sorkar jylla kala hap ban bei 30% bad ka sorkar pdeng 70% bad haduh ban da kut kane ka skhim ka sorkar jylla kan hap bei 50% bad ka sorkar pdeng 50%.
Haba ia dei bad kane ka jingdawa jong ki nonghikai ka sorkar kam shym la shong kli kti kala bthah ia ki ophisar ba kin peit ha kano ka rukom hap ban leh, namar ki don haduh 13000 ngut ki nonghikai SSA bad kiba hikai Adhok ki don 10000 ngut hap ban peit lang ia ki nonghikai.
Ha pdeng ki jingduna ka sorkar kala dang ki lat ki lynti kumno ban iarap ia ki nonghikai, u la ong ba u sngewsynei ba iohi ba ki nonghikai ki hap ban shong ha madan, ha ka juh ka por ruh u don ka jingsngew ia ki khynnah skul, u kyntu ia ki nonghikai ba kin leit phai biang sha skul.
U myntri la ong ba ka sorkar ka dang peit ia ki lat ki lynti baroh ba kumno ban iarap ia ki bad la bthah ia ki ophisar ban peit kumno ban iarap ia ki nonghikai, la kyntu ia ki nonghikai ba kin leit biang sha ki skul ban hikai ia ki khynnah.
