Shillong, Iaiong 10: Ban pynshlur ia ki samla pule kiba la pass ia ka eksam Secondary School Leaving Certificate 2026 kaba la pynlong da ka Meghalaya Board of School Education u myntri rangbah ka jylla u Conrad K Sangma mynta ka sngi u la ai burom ia ki ha ka jingialang kaba la long ha iing sah jong u ia kiba na lum khasi da ka pisa katba ia kiba ha lum Garo yn sa pynlong ha ka 18/Iaiong/2026.
Haba kren ha kane ka jingialang u myntri rangbah la ong ba kane ka jingiarap ka long kum ka dak ban burom ia ka jingpass ka jong ki bad ha ka juh ka por u ai khublei ia baroh 42000 ngut kiba la pass bad na ka bynta kito 6000 ngut kiba khlem pass ka dang don ka lad ba kin thoh biang ia ka eksam.
U myntri rangbah u la ong haba ki briew ki kylli ia kiba bun ki kam kiba la dep ban leh bad ki dang don kiba ym pat lah ban leh, hynrei kaei kaba pynhun ia u kum u briew bad u myntri rangbah ka jylla ka dei ba lah ban iada ia ka jingim jong ki longkmie ha ka por ba ki leit ban kha khun.
La ong ba baroh ki ia tip ba ka jylla Meghalaya ka dei ka jylla kaba bun eh ki longkmie kiba khlad ha ka por kha khyllung hynrei mynta la lah ban pynduna da 50% ia kane la lah ban leh da ka jingiatrei lang na baroh ki liang.
Kawei pat ka long haba ki samla pule ki phail kumba 50% ha ka SSLC bad kane ka dei kaba la pynsngewsih shisha ia u kum u briew bad kum u myntri rangbah, ka daw ka long ba kine ki dei kiba dang lung ka jingmut jingpyrkhat namar ki don ia ka thong ka jong ki dei ha ka klass X kaba ka jingpyrkhat ka sdang ban wandur hynrei ki duh noh ia ka jingkyrmen da kaba phail.
U la ong ba u sngewsih bad ka long kaei kaei kaba ym lah ban pdiang, haba iohi ia kane kumno ban pynbha bad u don ka jingkhmihlynti ban pynbha bad kila sdang ha ka rukom kaba rit hynrei kan iarap shibun ha ki por ban sa wan bad mynta ka sngi ka dei ka burom kaba ka sorkar ka ai ia ki.
U myntri rangbah la ong ba ka eksam SSLC kam dei ka jingkut dei tang ka jingsdang, la ong ba nangne sha khmat kin dang ia kynduh shibun ki jingiaidlynti ha kaba ki hap ban shim ia ka rai bad u myntri rangbah u la kyntu ba kin bud ia kaei kaba don ha ka dohnud bad ia kaei kaba ki angnud ban poi sha ka thong.
Ha kane ka jingpynkup burom ia kiba la pass bha la don lang u myntri ka tnad pule u bah Lahkmen Rymbui, ki ophisar na ka tnad pule bad CM Secretariat bad ki headmaster bad Headmistress jong ki skul.
