New Delhi, K. Lyngkot 18: Haduh ka 18 tarik Kyllalyngkot, 2021 la pynthikna ba ka don ka jingpur ka khlam Avian Influenza ha ki syiar ha 5 tylli ki jylla bad ha ki tyngab bad ki sim kiba her na kawei ka jaka sha kawei ka jaka/ki sim khlaw ha 9 tylli ki jylla.
Shuh shuh, la pynthikna ka jingdon ka khlam Avian Influenza ha ki nongmuna jong ka sim puka ba la iap ha Tis Haari, New Delhi bad ha ki tyngab na Red Fort, Delhi bad ha kaba iadei bad kane la pynmih ka jingbthah ha Delhi ban shim ia ki sienjam ba donkam.
Ha Maharashtra, la phah ia ki RRT bad la sdang ka jingpyniap ia ki syiar ha baroh ki jaka ba shah ktah. Ka jingpyniap ia kine ki sim ba shah ktah ha ka khlam la pyndep ha CPDO, Mumbai bad ka kam ban pynkhuid bad synreit dawai ka la iaid shakhmat.
Kumjuh ruh, la pyndep ia ka jingpyniap bad ka pynkhuid ha ki jaka ba shah ktah jong ka Latur distrik ha ka shnong Kendrewadi, Ahmedpur,ka shnong Sukani bad Tondar (Vajrawadi) ha Udgir taluk bad ka shnong Kurdwadi ha Ausa taluk.
Shuh shuh, ha Madhya Pradesh (ha ki Distrik jong ka Harda bad Mandsaur) bad Chhattisgarh (Distrik Balod), la phah ia ki RRT na ka bynta ban pyniap ia ki syiar ha ka jngjngai kaba 1 km na ki jaka ba pur ka khlam ha ki syiar. La bteng ia ka kam ban pyniap ia ki syiar ha ki jaka ba shah ktah ha (Distrik Panchkula).
Ka kynhun sorkar pdeng ba la thaw ban peitngor ia ka jinglong jingman ha ki jaka ba shah ktah ha kylleng ka ri ka la leit sha Maharashtra ban peit bniah ia ki jaka ba pur ka khlam AI bad ka la pynlong ia ka jingpeit bniah epidemiology. Kane ka kynhun ka la pyndep ia ka jingleit jngoh sha Kerala.
Ka Tnat ka la bteng ban pynsngewthuh paidbah shaphang kane ka khlam lyngba ki social media kum ka Twitter, Facebook.
