Shillong, Kyllalyngkot 16: Ka Umsaitsning Sports Club ka la rah ia ka namlahduh ha ka lympung ialehkai Inter Village 2025-26 ba la pynlong da ka Mawlyngkhung Sports and Cultural Club hadien ba ka la pynliem da 2-0 kol ia ka Nongkya Sports Club ha ka jingialehkai phainal ha ka sngi Balang 14 tarik ha madan ialehkai phutbol ha shnong Mawlyngkhung, Ri Bhoi District.
Ha ka jingialehkai ka kylla step ym shym la don ba ioh ban pynkhih jar, katba ha ka kylla miet ki rangialehkai ka Umsaitsning ka la thep ar kol bad rah syndon ia ka namlahduh ha ka sien basaw mynta u snem.
Da kane ka jinggjop ka Umsaitsning ka la rah ia ka song pisa ba T.50 hajar ryngkat ka trophy bad ka Nongkya ka la rah ia ka song pisa ba T.20 hajar ryngkat ka trophy, ia ka nam top Scorer la rah da u bah Lurshai Laloo na Mawlyngkhung SC, best Player Rebok Mukhim na Nongkya bad Man of the match u Pyndaplang Khonglam na Umsaitsning.
Ia kane ka lympung la pynhap pyrda da u bah AM Shadap, Vice President bad Chairman ka APC Youth Hostel Association of India (YHAI) Meghalaya State Branch kum u kongsan bad u samla Neversad Mawkdoh Sports Secretary ka Ri Bhoi Youth Federation (RBYF) sengkmie kum u Symbud kongsan ha ka jingdonlang bah Banshan Nongbet u Rangbah shnong Mawlyngkhung, u bah Gershom Dkhar Secretary ka shnong Mawlyngkhung bad kiwei ki riew rangbah ka thain katba ia ka jingialang la pyniaid da u samla Iaraplang Pnar Secretary ka Mawlyngkhung SC. Ha kane ka lympung la wan ban shim bynta 32 tylli ki kynhun ialehkai.
