New Delhi, Jylliew 21: U Myntri Rangbah duh jong ka ri, u Narendra Modi u la ai jingkren sha ka ri lyngba ka video conference mynta ka sngi kaba long ka sngi kyrpang jong ka International Yoga Day.
U Myntri Rangbah duh jong ka ri u la ong ba kane ka sngi ka dei ka sngi jong ka jingiatylli bad ka sngi jong ka jingsngew jan jong baroh ki briew ha kane ka pyrthei. Namar jong ka khlam COVID-19, mynta u snem la rakhe ia kane ka sngi lyngba ki lad electronic bad digital.
U Myntri Rangbah duh jong ka ri u la ong ba ki briew ki leh Yoga ha la iing bad ki bahaiing jong ki da kaba bynrap ba ka Yoga ka pyniajan ia ngi baroh.
Ka jingiashim bynta jong ki briew na kylleng ka pyrthei ha ka jingiakop shna video halor ka thup – ‘My Life – My Yoga’ kaba mut ‘Ka jingim jong nga – Ka Yoga jong nga’ ka pyni ia ka jingsaphriang jong ka Yoga, u la ong.
Ha kine ki por mynta, ngi dei ban kiar na ki jingialang bun briew bad kumta ngi dei ban leh Yoga ha la iing bad ki bahaiing jong ngi. Ka thup jong ka jingrakhe ia kane ka sngi kyrpang mynta u snem ka dei, ‘Ka Yoga ha Iing bad ka Yoga ryngkat bad ki bahaiing’.
Ka Yoga ka kyntiew ia ka jingiajan ha ka longiing namar ki khynnah, ki samla bad kiba la rangbah ki ialeh Yoga lang ha la iing bad ka don ka jingiajan hapdeng jong ki. Ka yoga ka kyntiew ruh ia ka jingsuk mynsiem, u Myntri Rangbah duh jong ka ri u la ong.
“Ka Yoga ka kyntiew ia ka jinglah jong ka met ba kan ialeh pyrshah ia ki jingpang. Phi dei ban pynlong ia ka Pranayama kum shi bynta jong ki kam ba phi leh man ka sngi.
Ka Pranayama Yoga lane ki rukom pynhiar mynsiem ka pynkhlain ia ka bor pynhiar mynsiem jong ngi. Ka long kaba iadei bha bad kine ki por mynta namar ba ka dei ka bor pynhiar mynsiem jong ka met kaba shah ktah bha ha u khniang Covid-19,” u Myntri Rangbah duh jong ka ri u la ong.
U Myntri Rangbah duh jong ka ri u la ong ruh ba ka Yoga mynta ka kylla nongpyntylli. Ka pynskhem ia ki jingiadei jong ki briew bad kam ibein iano iano ruh. Kam peit ia ka jaitbynriew, ka rong snieh doh, ka jinglong kynthei ne shynrang, ka jingngeit niam ne ka jaka sah.
Uno uno u briew u lah ban sdang ban leh ia ka Yoga. Lada ngi lah ban peit bha ia ka jingkoit jingkhiah bad ka jingkyrmen, kan ym slem ba ngin iohi ia ka pyrthei ba dap da ki briew kiba koit bad kiba kmen. Ka Yoga ka lah ban iarap ban pynurlong ia kane.
“Kum ki briew jong ka ri, ngin iaid shaphrang kum kawei ka longiing, kawei ka imlang sahlang kaba iatylli. Ngin ialeh ban pynlong ia ka ‘Yoga ha iing, Yoga bad ki bahaiing’ kum shi bynta jong ka jingim jong ngi. Nga ngeit skhem ba ngin long kiba jop ha kane ka thong,” la bynrap u Myntri Rangbah duh jong ka ri.
