Guwahati, Jymmang 19: Ka tnat Legal Affairs hapoh ka tnat Law and Justice ka dang pynlong ia ka Conference kaba ar sngi halor ka ‘India’s Progressive Path in the Administration of Criminal Justice System’ ha ka Dr. Bhupen Hazarika Auditorium, IIT Guwahati.
Ka bynta kaba nyngkong ka la long ha kane ka janmiet kaba la dep ha ka jingiadonlang u Arjun Ram Meghwal, Mytntri Khynnah (Independent Charge), ka tnat Law and Justice, Justice Hrishikesh Roy Judge, Supreme Court of India bad Justice Biswanath Somadder Chief Justice High Court of Sikkim.
Ha kane ka sngi la wan iashim bynta ruh da ki briew kiba bun kiba kynthup ki judge jong ki High Court bapher bapher, ki nongiasaid ain, ki riewshemphang, ki nongmihkhmat na ki kynhun ba pyntreikam ia ka ain, ki hehpulit, ki nongiasaid ain jong ka Sorkar, ki District Judge bad kiwei kiwei ki ophisar ha ryngkat ki samla pule ia ka ain.
Kane ka Conference ka la long hadien ka jingpyntreikam ia lai tylli ki ain ba thymmai kiba iadei bad ki kam beain kiba long ka Bharatiya Nyaya Sanhita 2023, Bharatiya Nagarik Suraksha Sanhita 2023 bad Bharatiya Sakshya Adhiniyam 2023 kiba wan bujli ha ka jaka jong ka Indian Penal Code 1860, ka Code of Criminal Procedure, 1973 bad ka Indian Evidence Act, 1872. Kine ki lai tylli ki ain kin treikam naduh ka 1 tarik u Naitung 2024.
Ha kane ka bynta kaba nyngkong, ka Dr.AnjuRathi Rana, Additional Secretary, ka tnat Legal Affairs, ka la batai shaphang ka jingthmu jong kane ka Conference bad ruh ka jingkongsan jong kine ki lai tylli ki ain kiba long kum ka dak jong ka jinglait na ki jingshah ha ki por jong ka jingsynshar ki mynder bad ruh ka jingpdiang ia ka kam ain kaba ryntih kyrdan, kaba seisoh bad kaba iahap bad ki jingdonkam jong kane ka ri kaba iar.
Kane ka jingkylla ka dei ruh ka dak jong ka jingskhem jong ka India katba ngi dang jam shakhmat kum ka ri katba ngi skhem beit ha ka nongrim jong ka RitiSynshar jong ngi.
Ka la ban jur ruh halor ka jinglong kongsan jong ki jylla ka thain shatei lammih ngi bad ki briew kiba sah ha kane ka thain ha ka jingwanrah ia ka jingkylla ha ka ri ba kynthup ka jingwanrah ia ka kam ain kaba niewkor ia ki briew ha India.
Kane ka conference ka dei ka jingpyrshang ban ai jingtip ia kito kiba don ha kane ka kam shaphang kine ki lai tylli ki ain ba thymmai bad ki mat ba kongsan jong ki.
Ha ka jingai jingkren jong u ha kane ka sngi, u Dr. Rajiv Mani, Secretary ka tnat Legal Affairs hapoh ka tnat Law and Justice u la ong ba kane ka conference kam dei tang na ka bynta ka jingiaphylliew jingmut halor kine ki lai tylli ki ain hynrei ka dei ruh na ka bynta ka jingpdiang ia ka jingsngew sarong ia ka nongrim lajong.
Lyngba kane ka conference, ngi rakhe ia ka jinglaitluid na ka kam ain jong ki por jingshah synshar ha ki mynder. U la kren shaphang ka nongrim jong ka jingpyntreikam ia kine ki lai tylli ki ain kiba iadei bad ki kam beain bad kumno kane ka la pyllait ia ki kam ain na ki nongrim ba la wanrah da ki nong Bilat kaba la thmu ban pynneh ia ka jingsynshar ka Bilat ia ka India da kaba ai daw ba kane ka dei na ka bynta ka jingbat ia ka ain.
Kumta, la wanrah ia kine ki lai tylli ki ain ba thymmai ban pynkylla ia ki kam ain kiba iadei bad ki kam beain ha ka ri khnang ba kane ka kam kan long kaba kham iarap ia ki briew jong ka ri.
U la ong ba ka thain shateilammihngi kaba don phra tylli ki jylla bad la ka jong ka histori bad jinglong kaba kyrpang ka ju don beit ka bynta kaba khraw ha ka roi ka par jong ka ri bad ba mynta ka don ha ka khep ban don ka bynta kaba khraw na ka bynta ka lawei.
U la ong ba kine ki lai tylli ki ain ba thymmai kiba iadei bad ki kam beain ki la wan bujliia ka jingngeit ha ka ain kaba pynshitom da kaba niewkor ia ka jingpynbha bad ka rukom treikam kaba iarap ia ki lanot.
Ka Dr.Reeta Vasishta Member Secretary, Law Commission of India ka la batai bniah shaphang ki jingwad bniah hashuwa ban thaw ia kine ki ain ba thymmai khnang ba kin iahapha ka imlang sahlang bad ka ri kaba dang kylla. Ka la batai ruh ia ki bynta bapher bapher jong kine ki ain ba thymmai.
U Ravi Kota, Chief Secretary, Sorkar Assam u la ai jingsngewnguh ia ka tnat Law and Justice jong ka Sorkar Pdeng kaba la jied ia ka Guwahati ban pynlong ia kane ka jingilang kaba kongsan kaba don ka lad ban wanrah ia ka jingkylla kaba khraw ia kito kiba iadon bynta ha kane ka kam ha ka jylla bad ruh ha baroh kawei ka thain.
U la ong ruh ba ka Sorkar Assam kan ai baroh ka jingkyrshan ba donkam na ka bynta ka jingpyntreikam bad ka jingai jingtip shaphang kine ki lai tylli ki ain ba thymmai ha ka jingiatreilang bad ka Sorkar India.
Ha ka jingai jingkren jong u, Chief Justice of Sikkim High Court, Justice Biswanath Somadder u la ong ba ka Bharatiya Nagarik Suraksha Sanhita (BNSS) kaba thymmai ka plié ia ka lad kaba pura ban peit ia ki kam beain ha kane ka juk digital.
U la ong ba ka BNSS ka plié lad ban pynlong ia ki jingbishar, ki jingbuddien bad ki kam lyngba ki lad digital bad ba kane ka iahap bha bad kane ka juk mynta.
Ka BNSS ka ong ruh ba ki jingtohkit ha ki kam beain ki dei ban pyndep hapoh ki lai snem, dei ban ai ka raihadien 45 sngi ba la dep bishar. Kane kan iarap bha ha ka jingpynkhuid ia ka jingsahdien ki case bad ruh ka jingpynthikna ia ka jingioh ia ka hok ha ka por kaba biang.
U la iaroh ruh ia ka jingwanrah ia ka jingtrei ha ka imlang sahlang kum ka jingpynshitom ha ki kam beainbaritbaria da kaba ong ba kane kan iarap bha ia ka rukom treikam ka ain ban wanrah ia ka jingkylla bad u la ai jingmut shuh shuh halor kane ka bynta.
U la ong ruh ba katba kine ki lai tylli ki ain ba thymmai ki wanrah ia ki rukom treikam kiba iahap bad kane ka juk mynta, kin wanrah shuh shuh ruh ia ki jingkylla kiba iahap bad kane ka juk mynta bad ka jingbat ia ka Riti Synshar jong ka ri.
Kam don ka jingkut ha kaba iadei bad kanokano ka ain lane ka jingpyntreikam ia ka. Hynrei, ki briew ki dei ban long kiba kloi ban pdiang ia ki jingkylla kiba bha kiba pynbiang ia ki jingdonkam katkum ka juk mynta.
Ha ka jingai jingkren jong u, Arjun Ram Meghwal, Myntri Khynnah (Independent Charge), ka tnat Law and Justice u la batai shaphang ka histori kaba la wanrah ia ka kam ain ha India bad ruh ki ain kiba iadei bad ki kam beain.
U la ong ba ia ki ain ha India la thaw ha ka por jong ka jingsynshar ki mynder bad ba ki la kyntait ia ki jingngeit tynrai bad ki jinglong ha ka imlang sahlang jong ka India ha kato ka por namar la buh nongrim ia kane ka kam ha ka jingmyntoi jong ki nongsynsharnabar ka ri.
U la ong ba ka IPC kam dei ka ain kaba don nongrim ha ka jingpyrkhat sani bad ka jingwad bniah hynrei ka dei ka rukom pyrkhat ba la shu wanrah kyrkieh da kaba pynbudia ka kam ain jong kawei pat ka ri. Ka jingniewkoria ka jingpynshitom, ym ka hok ha ki ain ba don ka dei ka dak jong ka jingpeit shiliang jong ki nongsynsharnabar ri pyrshah ia ki briew jong ka ri.
Ki lai tylli ki ain ba thymmai kiba iadei bad ki kam beain ki la pyrshang ban pynbeitia ki jingpeit shiliang ba hyndai, bad ban pyniahap ia ki bad ki jingdonkam mynta jong ka ri kaba dang kiew bad ki briew jong ka.
U Myntri u la ong ba kine ki conference kim dei tang na ka bynta ka jingai jingtip shaphang kine ki lai tylli ki ain ba thymmai hynrei ka dei ruh ka jingpyrshang ban ioh jingnang jingstad na kito kiba la tbit bha ha ki kam ain ha kaba yn peit ia ki bynta ba dang hap ban pynbha shuh shuh namar ka kam ain ha India kam dei kaba sahkuthajuhhynrei ka dei kaba iar bad kaba kyllakatkum ka jingdonkam jong ka por.
Ha ka jingai jingkren jong u, u kongsan jong kane ka bynta kaba nyngkong, Justice Hrishikesh Roy, Judge, Supreme Court of India u la ong ba kane kam dei tang ka jingialang jong ki briew kiba iadon bynta ha ki kam ain hynrei ka dei ka jingiawan lang jong ki briew na ki bynta bapher bapher jong ka imlang sahlang.
Ha ka jingkynthoh ia ka Indian Penal Code jong u Macaulay bad ka Indian Evidence Act jong u Stephen namar ka jingdon nongrim jong ki ha ka por jong ka Syiem Victoria, u Justice Roy u la kdew sha ka kaiphod ba 47 jong ka Law Commission kaba la ong ba dei ban don ki jingkylla ha ki ain kiba iadei bad ki kam beain.
Ka jingpeit bniah jong kine ki lai tylli ki ain ba thymmai ki dei ha ka jingwanrahia ka jingbha, ym ha ka jingpynshitom da kaba peit bniah ruh ia ki bynta jong ka imlang sahlang ba shem jingeh.
Ha kaba iadei bad ka jingset patok, u la ong ba katkum ka data jong ka 2019 National Crime Records Bureau, ki don kumba 478,000 ngut ki koidi ba shah set phatok bad na kine, kumba 300,000 ngut ki dei ki Scheduled Caste bad Scheduled Tribe.
U la kdew sha ka jingkren jong ka President DraupadiMurmu ha u 2022 shaphang ka jingdap briew ha ki phatok bad ka jingset phatok bun bun snem, u la ong ba kane ka pyni bha ia ka jingdonkam ia ka ain kaba wanrah ia ka jingkylla.
Kine ki lai tylli ki ain ba thymmai ki pdiang ia ka rukom treikam ba wanrah jingkylla, da kaba wanrah ia ka jingbahkhlieh bad ki lad ban pynshitom, katba ki ai bynta ia kiba la leh bakla bad ki briew ha ka imlang sahlang kiba shah ktah ba kin iadon bynta ha ka jingpynbeit, da kaba thmu ba ka hok ka kham ksan ban ia ka jingpynshitom.
U la ong ba kine ki lai tylli ki ain ba thymmai ki plié lad ia ngi ban pynkylla ia ka rukom treikam ka ain ha ki kam beain ha ka ri. Hynrei u la ong ruh ba ia ki ain ba la weng bujli dei ban sngewthuh na ka liang jong ki jinglong jingman ha kito ki por bad ba ki la don ka bynta ha ka jingwanrah ia ki rukom treikam ha ka ain hynrei, katba dang kylla ki por, ki dei ban iahap bad ki jingthmujong ka Viksit Bharat.
