Shillong, Rymphang 26: Mynta ka sngi kawei ka kali Bolero kaba don ia u number ML 05 – Z- 0515 ka la kem ding kynsan hajan Civil Hospital bad kane ka la pynkyndit ia ki paidbah ba leit ba wan ha katei ka surok G.S Road.
Katkum ki khubor kiba la ioh la ong ba kane ka kali kaba la pyndonkam da ka tnad pulit ka dang mih na Assembly kaba dang iaid ka jingiashong dorbar ha Rilbong hynrei ynda poi ha kane ka jaka kala kem ding kynsan ha kane ka por ba jia u don tang u nongniah marwei.
Ka kali pynlip ding kaba don pyrshah ka jaka tong um ka Shillong Municipal Board ban leit sha Assembly ka la mih na katei ka jaka bran bran bad poi ha ka por kaba biang ha kaba la lah ban tem ia ka jingklang ka ding ha kane ka jingjia kam shym don kano kano ka jingmynsaw.
Na ka liang ki pulit ki la poi kloi lan sha kane ka jaka ba kem ding ka kali Bolero ban jurip ia ka daw jong ka jing kem ding kane ka kali kaba la jia mynta ka sngi katba ka dang wan na Assembly ha Rilbong.
