Kem ki Pulit ia lai ngut kiba donkti ban pajut sohshkor, kynthup ia ka kynthei ba 16 snem

Kem ki Pulit ia lai ngut kiba donkti ban pajut sohshkor, kynthup ia ka khynnah ba dang 16 snem tam

Shillong, Jylliew 22: Ki Pulit ka Mawlai Police Station, mynta ka sngi kila ioh ban kem ia lai ngut ki briew ba kynthup ia kawei ka kynthei kaba tuh khoila ne soh shkor na ki khynnah rit kumba la iohi ha ki social media.

Kane ka video ba shah tuh soh shkor kala saphraing bha ha ki rynsan social media.

Halor kane ka jingjia, ka Mawlai Police Station ha ka 18 tarik mynta u bnai Jylliew kala ioh ia ka jingujor lyngba ka ejahar ba la mudui da ka kong Elinda Marbaniang   ba shong basah ha ka Mawlai Nongkwar Block, kaba la kdew ba ha ka por kumba 1.30 haduh 2 baje mynsngi katba ka khun jong ka, ka dang wan phai na skul la don kawei ka kynthei kaba la buddien ia ka na ki mawkyndon ha Wahumkhrah bad la kylli ia ka khun jong ka, la ka ithuh ne em ia u Adrian uba pule haka class III  ha kaba kala jubab ba kam ithuh satia.

Kane ka kynthei ka buddien ia ka haduh Mawlai Nongkwar Block-2 bad hadien kata kala ktah ia ki shkor jong ka bad da ka bor kala pajut ia ki soh shkor bad phet bak na katei ka jaka.

Halor kane, ki pulit ka Mawlai PS kila register Case No 61(6)2025 U/s 304(2)/115(2)/351(2) BNS

Ha ka 20 tarik, mynta u bnai ka Mawlai PS kala ioh pdiang biang sa kawei ka ejahar ba la mudui da ka kong Sumardiam Kharlukhi ban a Mawlai Nonglum,  ha kaba la iathuh ba ha kane ka sngi kumba ha ka por 4 baje haduh 4 shiteng la don lai ngut ki briew ki bym ithuh satia ba kythup ia kawei ka kynthei bad ar ngut ki shynrang.

Kine ki briew kia sdang ban wan tur sha jan iing katba ka khun ba dang 9 snem ka ka rta ka dang ialehkai shabar. Kane ka kynthei kala rung bad pajat jubor ia ki soh shkor na ka shkor jong kane ka khynnah bad phet noh bak na kane ka jaka.

Halor kane ka jingjia, ki pulit ka Mawlai PS kila register Case No 62(6)2025 U/s 304(2)/3(5) BNS.

Ha kaba iadei bad kane ka jingjia, ki pulit kila kem noh ia kawei ka khynnah kaba dang 16 snem 9 bnai, u Mabanker Jyrwa (23 snem) basah ha Jaiaw, Lansonalane bad u Charles Myrthong (20 snem) uba shong basah ha Riatsamthiah.

Ha kaba iadei bad ki soh shkor kiba la tuh la dep ban ioh biang, da ka jingialam lynti kane ka khynnah kynthei ba dang 16 snem ha ryngkat bad kine kiba shah kynnoh na Mawbah, New Oscar Jewellers Shop bad la kurup noh syndon ia ki.