Shillong, Kyllalyngkot 31: Ki pulit jong ka Sardar Police Station kila ioh ia ka ejakar ha ka 29/1/2026 bad ha ka 22/1/2026 ba ar ngut ki briew kila rung ha M/s AK Enterprises ha Glorys Plaza bad tuh ia ka mobile phone Samsung Galaxy S23 Ultra.
Ia kane ka jingshah tuh la iohi ha ki rynsan social media ia ka Video kaba la saphriang bha, haba ia dei bad kane ki pulit kila pynlong ia ka jingtohkit kaba la khlieh duh u Sub Inspector SI Arkwis Iawphniaw jong ka Sadar police Station.
Ha kane ka jingtohkit ki pulit kila ioh ban kem ha ka 30/1/2026 na shnong Mukhla jong ka West Jaintia Hills District, kine kiba la shah kem ki long u Bracely Suna bad u Underson Sumer.
Haba ia dei bad kane ka jingjia ki pulit ki dang pynlong shuh ia ka jingtohkit ban tip la kine ki briew kila don kti ne em ha kiwei kiwei ki kam tuh kam thim bad ki kam knieh bad patan jubor ia ka jingdon jingim jong ki briew.
