Mawtamur, Nailur 22: Ha ka jingialang kaba la long ha pdeng ka shnat raid Nongwah-Mawtamur bad ka Joint Action Committee (JAC) ka Hima Sohiong ha, shnong Mawtamur ha ka sngi Saitjain, kila shim ia kawei ka rai ba ka Khasi Hills Autonomous District Council ka dei ban weng noh mardor ia u Lyngdoh jong ka Hima Sohiong namar ba u la leit ban aiti ia ka shnat raid jong ka Hima sha ka Hima Jriang.
Ha kane ka jingialang paidbah, u Bah Sherborlang Lyngdoh Mawlong MDC jong ka Sohiong u ba la ia don lang ha kane ka sngi u la ong ba u la wan hi da lade sha kane ka jaka ban sngewthuh ia ka jingshisha mynta un sa iakren bad u CEM jong ka KHADC ha kaba ia dei bad ka jingdawa ban wengnoh ia u Lyngdoh jong ka Hima Sohiong.
Ha dien bala ioh ia ki kot ki sla ban pynshisha ba kane ka shnat Riad Nongwah- Mawtamur ka dei shisha hapoh jong ka Hima Sohiong, na ka liang jong u kum u nongmih khmat na katei ka Hima u la wan ban sngewthuh ia ka jingsngew jong ki paidbah ha kane ka shnong bad u la kynthoh ruh ki MDC ba mynshuwa balei ki la ieh khlem peit ia kane ka jaka.
Ha jingkren jong u Rev B Wahlang u wei na ki riewrangbah na kane ka shnong Nongwah Mawtamur la ong ba ki kpa tynmen jong ki kila iathuh ba kane ka jaka ka hap hapoh jong ka Hima Sohiong, hynrei kane kala sah tang ka jingiathuh namar kim don ki kot ki sla ban pynshisha ia kata bad ka jylla Assam na ka por sha ka par ka juh wan ban kam ia kane ka raid Nongwah Mawtamur.
Hynrei na ka liang jong ki paidbah kila iakhun tyngeh pyrshah ia kane ka jingleh jong ka jylla Assam da kaba ki pynpra ia ki jingtei jong ka jylla Assam bad kane ka jingiakhun bad ka jylla Assam kala iaid haduh kine ki por, ha kine ki 30 snem kiba la leitnoh u Lyngdoh jong ka Hima Sohiong u khlem wan jngoh ia kane ka jaka, hynrei kaei kaba u la leh ka long ba u la aiti ia kane ka raid sha ka Hima Jirang.
Kum ki paidbah nongshnong ha dien ba ka KHADC kala thung Acting Lyngdoh ia u Bah Ras Thabha la lah ban ioh ia ki kot ki sla kiba ia dei bad ka raid kiba dei naduh u snem 1854 ban pynshisha ba kane ka Riad Nongwah Mawtamur ka dei hapoh jong ka Hima Sohiong, ka long kaei kaei kaba ym lah ban sngewthuh ba kumno u Lyngdoh Sohiong u leit ban aiti ia kane ka raid sha ka hima Jirang ha u snem 2015, ki kim kwah ban leit sha Jirang hynrei kin sah hapoh ka Hima Sohiong.
Ha ka jingkren jong u lamphang jong ka JAC, u Bah Pasbhalang Kharieh u la ong ba la lap ia ka jingaiti jong u Lyngdoh Sohiong ba mynta dei lyngba ka RTI kaba ka JAC kala pan bad kane kala ha u snem 2015 ha kaba la iasoh hapdeng u Lyngdoh sohiong ba mynta bad u syiem ka Hima Jirang bad u Bah KP Pangniang EM ba dei peit ia ki kam elaka ha katei ka por.
Ha kane ka sngi kiba la ia poi sha kane ka jingialang ki long ki dkhot jong ka JAC, baroh ki paidbah nongshong shnong ka Nongwah-Mawtamur,ha kane ka sngi la ioh ruh ia ki jingkren na ki dkhot jong ka JAC, u rangbah shnong Bah Useful Lapang, ha kane ka jingialang kila pynpaw ruh ia ka jingsngewnguh ia u Acting Lyngdoh u Bah Ras Thabha ba ha ka por ba lyngkot u al lah ban pynioh ia ki kot ki sla kiba ia dei bad kane ka raid.
Ha dien jingiakren bad ia pynshai ba ka Raid Nongwah- mawtamur ka hap hapoh jong ka Hima Sohiong, ka JAC ryngkat ki paidbah kila shim ia ka rai ba ka KHADC ka dei ban weng noh mardor ia u Lyngdoh Sohiong ba mynta. Ka jingialang kala shim ia ka rai ruh ba lada ka KHADC kam weng ki paidbah ka shnong Nongwah-Mawtamur bad ki paidbah na ka Hima Sohiong ki leit tur sha KHADC ban dawa ba dei ban weng noh ia u Lyngdoh ba mynta.
