Shillong, Lber 21: Ka Deputy Commissioner jong ka East Khasi Hills District kala pynjari ia ka kyndon 163 BNSS ha kaba la khang pyrshah ia ki briew ban theh khyndew bapthar namar ka pynjaboh ia ki wah.
Ka DC ka kong R M Kurbah kala ong ba la ioh pdiaq ia ki jingujor na kylleng ba ki don ki jingtei ban shna ia ki iing, ki dukan, ki surok, ka jingtih ia ki pipe um, bad kiwei kiwei dei ki jingshna bad ha kane ka jingshna ia ka khyndew kaba tih la lap bala bret pathar ha ki rud surok bad ki wah.
Kane ka jingbret pathar haba slap ka um ka tuid sha ki wah bad kane ka wanrah ia ka jingjaboh ki um ki wah bad ka pyntuid ruh ia ka khyndew sha ki pung bad kane ka ktah ia ki tyllong, kane ka buh ruh ia ka jingma ia ki briew bad ka ia ki ba don jingim ha ki wah.
Kane ka jingtheh khyndew pathar ka ktah ia ka mariang kumta ka DC kala pynjari ia ka kyndon 163 BNSS ban khanglad ia kane ka jingbret beain ia ka khyndew kaba la tih na ki jaka ba pyntrei.
Kumta kino kino ki jingtrei kiba don kam ban hap tih ia ka khyndew khlem da don kano kano ka jaka bret khyndew la khang pyrshah hynrei ki dei ban da ioh ia ka jingbit na ki bor kiba dei peit.
Kino kino ki bymbud ia ki kyndon bala buh ki pynkhein ia ka kyndon jong ka ain Construction and Demolition Waste Management Rule 2016, jong ka Central Pollution Control Board. Kino kino ki bynbud ki pynkhein ruh ia ka hukum jong ka Meghalaya State Pollution Control Board jong u snem 2025.
Ka jingtih khyndew kum kaba shna surok ban thep ia ki pipe um kane ruh kan ktah ia ki pung ki tyllong um bad kan ktah ia ka mariang, kumta kano kano ka jingtih khyndew kaba khlem da don ia ka jaka bret la khang pyrshah bad kane ka hukum kan neh haduh ban da pynbna da kumwei pat.
