Shillong, Rymphang 19: Mynta ka sngi ha ka por kumba phra duna ei ei la wankit ia u Dr. Ricky AJ Syngkong MP ka Lok Sabha na ka 2-Shillong (ST) Parliamentary Konstitwensi sha Dr. H Gordon Robert Hospital ha dien ba u la kyllon ha ka jingialehkai kynjat boll ha Mawiong.
Ha dien bala poi sha kane ka jaka sumar la khlad noh bad kane ka khubor kala sa phriang sted ha kaba ki paidbah da ki hajar kila poi sha Robert Hospital ban pynpaw ia ka jingsngewlem ha kaba bun na ki long kmie kila iam pang dohnud.
Ha kane ka sngi u President jong ka party VPP u bah Ardent Miller Basaiawmoit bad ki MLA MDC jong ka party kila poi sha Hospital bad ki nongkyrshan da ka jingsngewsih kthang halor kane ka jingjia kaba sngewsih kaba khlem poi pyrthat ba kan wan jia kumne.
Na ka liang jong ka sorkar u myntri rangbah ka jylla u Conrad K Sangma, ki Symbut myntri rangbah ka jylla u bah Prestone Tynsong, Sniawbhlang Dhar, ki myntri sorkar bad ki MLA kila ia poi sha Hospital ban pynpaw ia ka jingsngewlem.
U Myntri rangbah ka jylla u Conrad K Sangma haba kren ha ki lat pathai khubor u la pynpaw ia ka jingsngewsih kaba khraw namar tang ar taiew ei ei dang ia kynduh ha Delhi ha iing sah jong u bad ki dang ia kren ia ki kam na ka bynta ka jylla.
La ong ba la shai ka sngi ka Business Advisory Committee kan shong ban ia kren, bad na ka jingsngew jong u ka long ba la hap ban pynsangeh ia ka jingiashong dorbar la shai ka sngi wat la ka dei ka sngi ban wanrah ia ka mang tyngka, ia kane kin sa rai ha ka BAC la shai ka sngi.
U Symbut myntri rangbah ka jylla u bah Prestone Tynsong la ong ba ka BAC kan shong la shai ka sngi bad la dei hi ban pynsangeh ia ka jingiashong dorbar bad lada long kin pynlong ia ka jingsngelem la shai ka sngi ha iing dorbar.
