Nongpoh, Naitung 08: Ka kali kit niut kaba la ai da ka Executive Committee kaba rim ha ka por jong u bah pyniaid Sing Syiem ban pyndon kam ban kit ia ki niut kinier ha sor Nongpoh kala shu pynieng ia ka ha phyllaw jong ka Nongpoh Town Shoping Complex khlem pyndon kam ia ka naduh bala ai na KHADC.
Kuma la paw na ka jingthoh kaba la thoh ha kane ka trok kaba don ha katei ka jaka ka long ba na ka liang jong ka KHADC kala ai sha ka Synjuk Ki Rangbah shnong Ri-Bhoi District, Umrangksai Nongpoh. Ia kane ka kali la pynioh lyngba ka 15th Finance Commission na ka sorkar pdeng.
Ka jingai ia kane ka kali kit nuit ka dei ban pyndon kam ban kit ia ki niut kiba mih na ka sor Nongpoh ia kaba ka Synjuk ki Rangbah shnong kila aiti ia kane ka kali sha ka Nongpoh Town Committee, hynrei naduh ba aiti la shuset ha katei ka jaka khlem pyndon kam.
Haba u SP News Agency u la ioh ban ia kren bad u President ka Synjuk Ki Rangbah Shnong ka Ri Bhoi District u bah BB Makdoh, la ong ba ka dei ka jingshisha la ai ia kane ka kali sha ka Synjuk bad ka Synjuk kala ai sha ka Nongpoh Town Committee ia kaba u ba shimti u la shu set ha katei ka jaka.
La ong ba ka synjuk kala ioh ia ka jingpyntip haba ia dei bad kane ka kali ba khlem pyndon kam na ki daw kaba kim lah ban tip, hynrei kum ka synjuk ka don ka jingpyrkhat kumno ban leh ia kane ka kali, la iathub ba wat u Battery kane ka kalai la shah thuh. U CEM ba rim u la kren shai bha kane ka kali kan long na ka bynta ban kit nuit hapoh ka Nongpoh Town Committee.
