Shillong, Iaiong 5: Ka jingangnud ba la slem bha mynta kan sa wan ban urlong na ka bynta ka jylla Meghalaya, hadien ba ki bor ba dei khmih jong ka Airports Authority of India (AAI) kila khot ‘Tender’ ban pynheh ia ka kad liengsuin jong ka Shillong Airport.
Kane ka sienjam kala wan urlong, hadien ka jingtrei shitom ka sorkar ia kaba la lam khmat hi da u Myntri Rangbah ka Jylla u Conrad K Sangma uba la buh ia ka thong kaba hakhmat eh ha kaba iadei bad kane ka kad liengsuin.
Ka jingpynheh ia kane ka kad liengsuin kan dei 571-mitar na kaba la don lypa bad kane ka poi haduh 2,400 mitar ka jingjrong bad kane kan pynsuk ia ka jingiaid ki liengsuin A-320 ha Shillong.
Ha kaba iadei bad kane ka project kan kynthup lang ia ka jingpynheh ia ki Terminal Building bad ki Apron, ha ryngkat bad kiwei de ki jait jingtei, katkum ka Tender Notice, ka mang tyngka ban pynheh ia kane ka liengsuin ka long T.119.44 Klur bad ka por ban pyndep ia kane ka long khatphra bnai.
Na ka liang u Myntri Rangbah ka Jylla u Conrad K. Sangma ula ong, Kane ka jingpyllait Tender ban pynheh ia ka Shillong Airport kadei u soh jong ka jingtrei shitom ha kine ki snem kiba la leit bad kane ka wanrah ka jingkylla ha kiba bun ki liang, kum ha ka kam jngohkai pyrthei bad kan plie ruh ia ka lad ioh kam ioh jam ia ki khun samla jong ka jylla.
Naduh ba u Myntri Rangbah u shimti ia ka shuki u la rah ia kane ka mat ban pynheh ia ka Shillong Airport bad ka Sorkar Pdeng ha kiba bun ki bynta bapher bapher. Kane ka project kadei ka jingangnud jong ka jylla ban kylla long kum ka jaka jngohkai pyrthei hapoh ka ri.
Ka AAI kala dep ban aiti ia ka Master Plan kaba kala pynkhreh na ka bynta ban pynheh ia ka kad liengsuin ha u Nailar jong u snem 2024 bad ka jingshim jaka ban pynheh ka long haduh 22 akar bad ka kam mynta kala iaid shakhmat.
