Shillong, Rymphang 11: U bah Khroo L Pariat nongai buid ka Joint Action Committee u buh ka jingkylli ia baroh 60 ngut ki MLA kiba don, hynrei haduh mynta ym don ba treh ban kren ia ka jingkiew dor ki marbam, ha ki snem mynshuwa ki don kiba kren hynrei balei ym don ba sngap ia kane, imat baroh 60 ngut ki don kti bad ka sorkar ba ki shu sngap la ka sngap ai kan tyllun ka por.
U bah Khroo la ong kiba trei Master roll ha ka jylla Meghalaya la ong ba ka sorkar pdeng kala pyntreikam ia ka ain Labour Code kaba la pynlong ain ha u snem 2025 hynrei ha ka jylla Meghalaya haduh mynta ym pat pyntrei kam ia ka.
Katkum ka Labour Code 2025 kumba ka long mynta ha kiwei ki jylla kila pyntrei kam katba ha kane ka jylla Meghalaya kaba sngewsih ka long ba ympat pyntreikam haduh mynta, lada kane ka labour code kam trei kam kaei ka ban jia ka long kan ktah palat namar kiba trei bylla sngi bad ka sorkar kila shah pynshong thait.
Katkum ka labour code ka rta shongthait ia kiba bylla sngi, ka rta shong thait ka long 60 snem hynrei kiba peit iaka tnad sorkar kila pynshong thait ia baroh ki master roll kiba la dap 58 snem, halor kane ki sah ha ka umdum namar ka Labour Code ka pynshong thait 60 snem hynrei ki tnad sorkar ha Meghalaya ki pynshong thait 58 snem.
Na ka liang jong ka sorkar Meghalaya haduh mynta ka sngi kam pat ai ka jingshai kaba thikna ba katno snem ki nongtrei bylla ki shnong thait, ha u snem 2009 u Lat ka jylla u la pynmih ia ka jingpynbna ymdei ban palat ia ka 60 snem ka jingshong thait, hynrei ha u snem 2025 Naiwieng ka tnad personal kala pynduh noh.
Kumba ka long mynta bun hi ki master roll kiba la dap 58 snem kila shah pynshong thait jubor, halor kane ka JAC kala pan ban ia kynduh ia u myntri rangbah ka jylla naduh u Naiwieng jong u snem 2025 hynrei haduh mynta pat ai kyntien ne um kwah hi ruh ban ia kynduh, kane ka buh jngma ia ki nongtrei master roll.
Na ka liang jong ka Joint Action Committee ka ong ba lada ki 60 ngut ki MLA kim kren halor kane ka Labour Code, na ka liang jong ki kim ban se ban kren hadien bala kut kane ka dorbar mang tyngka mynta u snem.
