Shillong, Iaiong 10: Haba ia dei bad ka result jong ka Secondary School Leaving Certificate kaba la pynmih da ka Meghalaya Board of School Education ha ka 7/Iaiong/2026 u myntri rangbah ka jylla u Conrad K. Sangma u la pynpaw ia ka jingsngewkmen ka jong u ban iohi ba ki samla kila pass palat ia ka 86 persent.
Haba kren ha ki lat pathai khubor mynta ka sngi la ong ba u da kmen shisha ia ka jingbun kiba pass ia ka matrik, namar ki don ki snem ha kaba kiba pass ia ka matrik ki long tang kumba 50 persent, ki kwah ban iohi ba ka jingdon kiba pass kan dang kham kiew bha shuh shuh.
Ka sorkar kala plie ruh ia ka lad ba lada ki samla pule kim pass ha kaba ki thoh ia ka eksamin jong ki la ai ka lad ba kin thoh biang bad khmih lynti na ka jingbun kiba pass ka dang kiew bad kane ka dei tang kawei na ki lad ban pynbha ia ka pule puthi.
Ha ki khyndiat bnai kila shim ia ka rai ban pynbha ha kaba ia dei bad ka jingsiew ia ki nonghikai Adhoc bad SSA bad kane kala trei kam bad ha ka shitarik u bnai Jymmang ki nonghikai Adhok bad SSA kin ioh ia ka tulop kaba thymmai.U myntri rangbah u la ong ba u khmih lynti ba kane kan sa dang pynbha shuh shuh ia ka tnad pule puthi ha ka jylla hi baroh kawei.
Haba ia dei bad ki samla kiba pass ia ka Preliminary exam jong ka Union Public Service Commission mynta u snem ka sorkar kan sdang ban ai jingiarap da ka pisa, hooid la sdang ia ka jinghikai online la katto katne snem hynrei la hap ban pynsangeh namar ka jingwan ka COVID-19.
