Shillong Rymphang,18 : U Bah Titosstarwell Chyne u MDC jong ka Sohra ba dei ruh u nongialam ka liang pyrshah ha ka iing dorbar thawain ka Khasi Hills Autonomous District Council ba kam lah ban len ban ong ba kam ithuh ia u Maremdor Syiem u ba kum u syiem khynnah ka Hima Sohra namar ba ka ophis haba ka phah ia ka shithi ka thoh M.Syiem Deputy Syiem Sohra Syiemship.
Haba kren ha ki lad pathai khubor ha ophis trei kam u nongialam ka liang pyrshah ha KHADC mynta ka sngi u bah Titos u la kren shai ba um don kano kano ka jingpyrshah ia ka KHADC ban thung ia u syiem ba shipor ka Hima Sohra hynrei kaei kaba u kwah ban tip hato ka ophis ka ithuh ne em ba hapoh Hima Sohra don u syiem khynnah.
U la pynpaw ia ka jingbymlah jong u ban pdiang ia kaei kaba la jia hapoh ka iing dorbar ha ka por ba iakren ia ka kam hima jong ka Hima Sohra, namar hapdeng ka jingiakren kan don ka jingiakdew kti u la ong ba la katta snem kum u nongmihkhmat sha ka iing dorbar ka KHADC ki ia khluit ha bym ia shai ban ia kren ia ki mat na ka bynta ki paidbah hynrei kam juh don ka jing ia kdew kti haba iatai eiei hapoh ka iing dorbar.
U nongialam ka liang pyrshah u la ong ba lada kam don ka jingtip na u Executive member ba dei peit ki ophisar da lei lei kim nym lah ban phah ia kano kano ka jingthoh sha ka Hima lada ong ba ka don ka jingbakla kan long beit tang shi dak hynrei ha ka shithi ba la phah sha ka Hima Sohra la thoh shai ha u M.Syiem u Deputy syiem Sohra Syiemship kane kam dei shuh ka jingbakla.
