Shillong, Kyllalyngkot 19: U myntri rangbah ka jylla u Conrad K Sangma u la ia shim bynta ha ka jingrakhe ia ka jingdap 20 snem ka seng Samla Mawlai Pyllun bad ha kane ka sngi la plie ruh ia ka jingdro dur kaba heh ha Rymbai Petrol Pump ha Mawlai Mawiong Rim.
Ha kane ka sngi u myntri rangbah ka jylla u la ai ka jingiaroh ia ka seng kaba la lah ban poi sha kane ka thong ban kynjoh 20 snem bad kaei kaba ka seng samla ka leh kala iarap ia ka sorkar ha kaba pyntyllun ia ki kam bad ka dei ka kamram jong ka sorkar ban peit ia baroh ki kynhun.
U myntri rangbah u la ong ba ki samla ki long kiba don kam ha ka imlang sah lang bad ki seng samla ha ki rukom bapher bapher ki long kiba don kam bha, ymtang ha ki por ban sa wan hynrei mynta ruh ki long kiba don kam na ka bynta ka jylla.
Ha ba kren ha kane ka sngi u myntri rangbah u la kyntu ia ki samla ba kim shim kabu ia ki skhim kiba ka sorkar ka don ban ai bad kane kam dei tang ia ki samla ka Mawlai hynrei ia baroh ki samla jong ka jylla baroh kawei.
U myntri rangbah ka jylla la ong ba kane ka dei ka juk jongka jingiakop, u la kyntu ia ka seng samla Mawlai ba kin ai mynsiem ia ki samla ba ialeh ban kiew sha khmat, la ong ba kane ka jingdro dur kaba ha kaba ia ei bad ka tynrai u khasi kan iarap ba ki nongwan jngohkai kin sngewthuh.
Ha kane ka sngi ki dorbar shnong seng samla kila ai ia ki dorkhas sha u myntri rangbah ha kaba ia dei bad ki jingdon kam ha ka dong ka thian Mawlai baroh kawei, ha kane sngi la don lang u bah Teiborlang Pathaw MDC barim ki rangbah shnong bad kiwei kiwei ki seng samla.
