Shillong, Lber 30: Ka Director ka tnad sam bam sam dih ka jylla ka Saloni Verma, IAS kala ong ba katkum ka jingbthah ka sorkar pdeng ha ka 11/Lber/2026 kala don ka jingduna ha ki tyngdong lyer shet ba pyndon kam ha ki dukan ban shet.
Haba kren ha ki lad pathai khubor ka Director kala kren shai ba kam don jingduna ha kaba ia dei bad ki tyndong lyer shet kiba pyndon kam ha ki iing ki sem ban shet jingshet, ka sorkar pdeng ki kompeni ba wanrah ia ka lyer shet bad ki sorkar jylla ki peit ba kan nym don ka jingthut.
Na ka liang jong ka Director kala pynshai ka ei kaba long shuwa ka 11/Lber/2026 ka jingdon kam iaki tyngdong lyer shet man ka sngi ka long ha pdeng 6000 haduh 7000 tylli man ka sngi, haba la sdang jingjia ka thma la shem ba la sam sha ki paidbah man ka sngi 5000 haduh 7000 tylli man la ka sngi.
Na ka liang jong ka tnad sam bam ka ioh ia ka jingtip ba ka don ka jingthut bad na ka bynta kane ki don ar tylli ki daw, ka daw kaba nyngkong ka long ba ki kompeni ban ioh ia ka tyndong lyer ka don ka DAC kaba hap apply online bad na ka bynta kane don kam ia ka e-KYC bad kane ka dei ka jingbthah kaba la slem kam dei kaba mih hadien kane ka jingeh.
Hynrei ka mih noh kane ka jingeh na ka daw jong ka thma ki kompeni kiba pynbiang ia ki tyndong lyer shet ki pynlong ba baroh ki hap ban leh ia kane ka e-EKYC, dei na kane ka daw la iohi ia ka jingieng lain jong ki briew ha ki jaka sam lyer shet, haba kila kylli na ki kompeni ki ong ba kam don kata ka jingthut ha kaba pynpoi ia ka lyer shet kiba pyndon kam ha iing ha sem.
Kaba ar, haba ia dei bad ki lyer shet ba pyndon kam ha ki dukan shuwa ba kan mih kane ka jingeh ka jingdon kam ia ki tyndong lyer shet ka long 1000 tylli man ka sngi, hynrei namar ka don ka thma ka Middle East kala don ka jingthut ha kaba pynpoi ia ka lyer shet, haba iohi ia kane ka sorkar pdeng ka pynduna ia baroh ki jylla ha ka ri.
Ka sorkar pdeng kala bhah 20% man ka sngi ia ki tylli kaba mut na ka 1000 tylli kiba ka jylla ka don kam mynta, yn ioh noh sa tang 200 tylli man ka sngi, hynrei ia ki skul bad ki hospital la ai sha ki khlem don jingthut namar iaki hap ioh, dei na kane ka daw ka don ka jingduna ha ki Hotels bad kiwei kiwei ki dukan.
La iathuh ba kine ki ar sngi ki tyndong lyer shet ha ki dukan kila poi 400 tylli bad mynta ka sngi la ioh ia ka jingpyntip ba ka sorkar pdeng kan kyntiew noh ia ka bhah sha baroh ki jylla da 70% kane kan iarap ia ki Hotel bad ki dukan.
