Shillong, Nohprah 14: Ia ka Bynta kaba 5 jong ka Assam Rifles Half Marathon 2025 la pynlong mynta ka sngi ha Headquarter jong ka Directorate General Assam Rifles kaba don ha Laitkor, Shillong. La pynlong kum ka sienjam ba kongsan ban kyntiew ïa ka “Fit India Movement”, kane ka lympung ialehkai kaba man la u snem—ba la pynlong nyngkong ha u snem 2021—ka la kiew bha hapdeng ki riew sngewtynnad ban mareh ha kylleng ka ri.
Kane ka prokram mynta u snem ka la sakhi ïa ka jingïashim bynta na kylleng ka ri India, ha kaba palat 3,000 ngut ki nongïashim bynta ki la mihkhmat ïa 26 tylli ki Jylla bad 02 tylli ki Union Territory ha ki rta bapher bapher, kaba pyni ïa ka mynsiem jong ka jingïatylli ha ka jingiar bad ban kyntiew ïa ka jingïatylli jong ka Ri.
Ïa kane ka prokram la pynlong hapdeng ka jingitynnad jong ki lum jong ka East Khasi District ha Laitkor bad la wan iashim bynta da ki riew rangbah na ka Sorkar, ki Shipai bad ki nongtrei mon sngewbha na kylleng ka ri.
Ia kane ka Half Marathon la pynlong ha lai tylli ki thup: Cloud Chase (21 km), Pine Path (10 km) bad Crystal Stream (5 km). Ia kane ka jingiamareh la kaweh lama da u Lt Gen Vikas Lakhera, AVSM, SM, Director General Assam Rifles & ka Vibha Lakhera, President ka ARWWA na ka thup 21 km, u Maj Gen Jai Singh Bainsla, SM, ADG Assam Rifles, u Satish Nambiar, Executive Director & State head North east region & u Zubin Garg, CGM (Corporate Comn) Indian Oil Corporation Limited, ka Mumbai ka la kaweh lama ia ka thup kaba 10 km bad ia ka thup kaba 5 Km la kaweh lama da u Brig & ka Sachindra Tiwari, Brigadier Administration, Headquarters DGAR.
Ka jingiashim bynta baroh ka long 3,038 ngut ki nongmareh, kynthup 559 ngut ha ka Half Marathon kaba 21 km, 1,502 ha ka jingmareh kaba 10 km bad 977 ngut ha ka jingmareh kaba 5 km. La sam ia ki takma bad ki syrnot sha ki nongiashim bynta kum ka jingithuh ia ka jingtrei shitom jong ki ryngkat bad ki T-shirt buh jingkynmaw. La ai khusnam pisa kaba T. 20 lak sha 48 ngut ki nongmareh ha ki thup bapher bapher. Nalor kata, la sam ruh katto katne ki consolation prize.
Ha ka Overall Category, u Sandeep Devrari na 20 Kumaon, Indian Army u la long u lahduh ha ka 21 km (Men) ha ka jingmareh kaba 01 kynta 07 minit katba ka Tamsi Singh na Varanasi, Uttar Pradesh ka la jop ha ka 21 km (Women) ha ka jingmareh kaba 01 kynta 23 minit.
Ha kane ka sngi, u Air Marshal Surat Singh, AVSM, VM, VSM, AOC-in-C Eastern Air Command bad ka Nisha Singh, President Eastern Air Command, AFFWA ki la long ki Kongsan. U la ïaroh ïa ka jingshitrhem bad ka mynsiem ïalehkai jong ki nongïashim bynta bad ki nongpeitkai bad u la sam ruh ïa ki khusnam sha ki nongjop ha ka jingïakob kaba 21 km bad 10 km.
Ki shipai Assam Rifles kiba la ju tip kum ki “Sentinels of the North East,” ki dang ïaineh ban pynthikna ka shongsuk shongsain bad ka roi ka par ha kane ka thaiñ bad ki ju pynlong man ka por ïa ki sienjam ban kyntiew ïa ka “Fit India Movement”.
Haba ai jingkren ha kane ka sngi, u Lt Gen Vikas Lakhera, AVSM, SM, Director General Assam Rifles, u la ong ba kane ka lympung ialehkai ka thmu ban kyntiew ïa ka kolshor jong ka jingkoit jingkhiah, bad ka jingïalong lang kawei ha ka thaiñ Shatei Lammihngi bad ka la sakhi ïa ka jingkiew kaba phylla, ha kaba ka jingïashim bynta ka la kiew palat ar shah haba ïanujor bad u snem ba la dep.
