Shillong, Lber 13: Ka kynhun pulit ba kyrpang ka jylla Meghalaya kala ioh ban kem saw ngut ki briew na ka jylla Haryana ha kaba ia dei bad ka jingshahlute ki ATM na Mawkriah, Mylliem bad Smit kiba la jia ha u snem 2025 bad 2026.
Haba ia dei bad kane ka jingjia la thaw ia ka kynhun tohkit kaba kyrpang ha ka 27/Rymphang /2026 ban tohkit ia kine ki jingjia hapoh ka jingialam jong u Deputy Supritendent u Simseng Sangma, MPS kiba la leit sha ka jylla Haryana ban leit kem ia kiba la shah kynnoh donkti ha kaba lute ia ki ATM na East Khasi Hills.
Ha ka 9/Lber/2026 ki pulit ka jylla Meghalaya da ka jingiatrei lang bad ka kynhun tohkit Central Investigation Agency (CIA) jong ka Nuh District bad kem ia ki nongtuh ATM bad ha kane ka jingthwet la ioh ban kem ar ngut u Salim 26 snem u Rahul 31 snem ia kine la ioh kem na ka sor Nuh bad na Pingwan ha ka 10/3/2026.
Ia kine ki ar ngut kiba la ioh kem la ai bor ban kin bat ha kti ki pulit san sngi ban tohkit ki nongiarap kiba la tip kyrteng kum u John Fishal Lyngkhoi 32 snem bad u Joyous Dura 47 snem la ioh kem na Shillong bad ia kine ka iing bishar kala ai bor hynriew sngi ban bat ha kti ki pulit ban tohkit.
Ha kawei pat ka kynhun hapoh ka jingialam jong u Deputy Supritendent ki pulit ba dei peit ia ki kam sniew u Bipul Das, MPS kila ioh ban kem sa ia u Rejaul Korim 38 snem na Chakla, Bongaigoan bad Luis Ali 28 snem na Boragaon, na kine ki briew ki pulit kila ioh ban kurup ia ki kot ki sla bad ka jingtohkit ka dang iaid shakhmat ban thwet ia kiba dang lait phet.
U la pynkynmaw bai a ka ATM ha Mawkriah la lute ha ka 21/5/2025 ha kaba kila ioh ban rah ia ka pisa T.28,13,100/-tyngka. Ha ka 30/12/2025 ka ATM kaba don ha Smit kala shah lute bad kila ioh ban rah ia ka pisa T.35,57,000/-tyngka bad ha ka 8/2/2026 ka ATM kaba don ha Mylliem kala shah tuh T.35,00,000/- tyngka ia kine ki mokotduma la register ha Mawngap bad Madanrting Police Station.
