Shillong, Iaiong 5: Ka result ki khynnah pule ha ka School Leaving Certificate (SSLC) Examination 2025 kaba la pynlong da ka Meghalaya Board of School Education (MBOSE), haba ia nujor bad ki snem kiba la leit noh mynta ka jingpass bha jong ki khynnah kala kiew haduh 87.10%.
Ha kane ka jingpynbna result ki don haduh 341 tylli ki skul kiba la pass bha kata 100 na ka 100. Ha u snem 2024 ka jingpass ki khynnah ka long 55.80 % katba ha u snem 2023 ka jingpass ka long 51.93%, 56.96% ha u snem 2022 bad 52.90% ha u snem 2021.
Kila don 63,682 ngut ki khynnah pule kiba la ialeh ia ka eksamin SSLC mynta u snem bad kiba la pass ki don 55,473 ngut. Na kitei kiba pass, kila don 22,726 ngut ki shynrang bad 32,747 ki khynnah kynthei. Nalor kane, kila don ruh 18,903 ngut ki khynnah pule kiba la pass ha baroh 5 tylli ki sobjek, katba 36,570 ngut ki khynnah pule kila pass ha baroh 6 tylli ki sobjek.
Ka kyrwoh na ka MBoSE kala ai khublei ba ka jingbha jong ka resol mynta u snem kadei namar ka jingtrei shitom bad jingaiti lut jong ki khynnah pule, ka rukom pynkylla thymmai ia ki jingkylli bad ka jingwanrah ia ka CM IMPACT Guidebook.
Ka result jong ka Meghalaya Board of School Education (MBOSE) jong ka Secondary School Leaving Certificate (SSLC) 2025 ka long shisha kaba kham pher haba ia nujor bad kiwei ki snem ba la leit noh namar ba ki don haduh 35 ngut kiba rung ha ka thup top 10.
Katkum ka result ba la pyllait paidbah mynta ka sngi ia ka kyrdan ba nyngkong ba la ioh ban bat da ar ngut ki samla pule ba kynthup ia ka Leisha Agarwal na ka St. Margaret’s Higher Secondary School, Shillong, bad ka Avila Kathrene P Lyngdoh na ka North Liberty Higher Secondary School, Jowai, ki la ïabat lang ïa ka kyrdan ba nyngkong da kaba ïoh 582 marks.
Ha ka kyrdan kaba ar ki samla pule kiba la ia sam lang ha kajuh ka kyrdan ki kynthup ia u Evanshan Nongrum na ka Sacred Heart Boys’ Higher Secondary School, Shillong bad ka Pori Panday na Jawaharlal Nehru Higher Secondary School, Phulbari kiba la ioh mar 578 marks.
Ha ka kyrdan balai la ioh bat da u Sourav Pandey jong ka Alpha English Higher Secondary School, Nongpoh, u ba ioh 576 marks, katba ka Anamika Singh jong ka Gorkha Secondary School, Upper Shillong, kala wan ha ka kyrdan ba saw da kaba ioh 572 marks.
Katba ha ka kyrdan kaba san la don saw ngut ki samla pule kiba ioh marks mar kajuh kata 570 marks bad kine ki samla pule ki kynthup ia ka Taesha Grace Pakyntein, u Manderson Thongni, Esther D Shira, bad u Mahir Islam.
Ki don haduh hynniew ngut ki samla pule kiba ioh iaka kyrdan ba hynriew da kaba ioh marks 569 bad kine ki samla pule ki kynthup ia u A Arif Sheikh, Joody I Ryum Khonglah, Ranchita Paul, Obadaiah Joel Kharkongor, Ian Dongkam M Marak, Bathsheba Ch Sangma, bad sa u wei u khynnah.
Ka kyrdan ba hynniew la ia sam lang da ka Kriti Kumari bad ka Queency Kharsohnoh bad baroh kin ear ngut ki ioh 568 marks. Katba ha ka kyrdan ba phra la ia samlang da phra ngut ki samla pule kiba ioh 567 marks, Ha ka kyrdan ba khyndai la ia sam lang hapdeng lai ngut ki samla pule kiba ioh 566 marks.Ia ka kyrdan ba 10 la ia sam lang hapdeng ar ngut ki samla pule kiba ioh 565 marks.
