Shillong, Nohprah 18: U Lat ka jylla Meghalaya, u C.H. Vijayashankar, mynta ka sngi u la ialam ia ka jingrakhe ha ka Jylla ia ka lyngkhuh jingdap 85 snem jong ka jingiap jong u myllung ba pawnam ka ri Khasi u Soso Tham ha ka prokram ba la pynlong da ka tnad Art and Culture jong ka sorkar Meghalaya, ha nongbah Shillong.
U Lat u la ai burom bad buh syntiew ia U Soso Tham. Ha kane ka prokram la wan ïashim bynta da u Bah Sanbor Shullai uba dei u Myntri ka tnad Arts and Culture; Bah Frederick Kharkongor, Principal Secretary ka tnad Art and Culture; u Harish Chaudhary, Principal Secretary jong u Lat ka Jylla; Kong I Majaw, Director jong ka tnad Art and Culture; kiba haïing hasem jong U Soso Tham, ryngkat bad ki riew pawkhmat ba la khot sngewbha, ki riewstad, ki nonghikai, ki samla pule bad ki riew paidbah.
Ha ka jingai jingkren jong u Lat ka jylla u C.H. Vijayashankar u la ong ba “kito ki bym tip ia la ka histori kim lah ban thaw histori.” U la khot ia ki samla ban pyniasoh biang bad ki tynrai jong ki bad ban ioh mynsiem na ki jinglong bad jingaiti jong ki kpa tymmen jong ki.
Da kaba iaroh ia U Soso Tham kum u nongialam ha ka jingsarong ia la ka ktien bad ki jinglong tynrai, u Lat u la batai ia ki kam jong u kum kiba “ai mynsiem” kiba iaineh na ka bynta ka imlang sahlang.
U la ban jur ruh ia ka jingdonkam ban don ka rukom treikam kaba pura ha ka pule puthi bad ka jingsaindur, da kaba kyntu ia ki samla ban iashim bynta ym tang ha ki jingialehkai bad jingrwai hynrei wat ha ki kam saindur na ka bynta ka jingkiew shaphrang kaba ryntih.
Haba pdiang sngewbha ïa kane ka jingïalang, u Principal Secretary ka tnad Arts and Culture, u Bah Frederick Kharkongor u la ong ba U Soso Tham um shym la long tang u myllung hynrei u dei ruh uba iohi jngai uba la pynkylla dur ïa ki khanatang ba riewspah jong ka ktien khasi sha ka rukom thoh kaba ryntih, kaba pynthikna ïa ka jingpynneh pynsah ïa ki na ka bynta ki pateng ban wan.
Ki jingnoh synniang jong u ha ka thoh ka tar ki la wanrah ia ka jinglong ba iaineh ia ka ktien, ka histori bad ki dustur kiba lym kumta ki lah ban jah noh katba dang iaid ka por.
Ki jingiakren ha kane ka prokram ki la pynpaw ia ka jingpyrshang ba iai bteng jong ka Sorkar Jylla ban wad ban pynrung ia ka ktien Khasi ha ka Khyrnit kaba 8 jong ka Riti Synshar, da kaba ithuh ruh ia ka bynta jong u Soso Tham ha kaba pynwandur ia ka jinglong kyrpang jong ka ktien bad ka kolshor.
La pynkynmaw ruh ïa ki Chief Minsiter’s Researcfh Grant kiba T 3 lak kawei kawei, ha kaba la jied ïa 48 ngut ki samla pule ha u snem ba la dep ban bteng ïa ki jingpule halor ki phang kum ka khyndew ka shyiap, ka ktien bad ka jaitbynriew. La pynpaw ruh ia ka jingpyrshang ban iatreilang bad ki skulbah nabar ri na ka bynta ki jingwad bniah kiba kham halor shaphang ka kolshor bad ka pateng Khasi.
U Myntri ka tnad Arts and Culture ka sorkar Meghalaya u Bah Sanbor Shullai haba ai jingkren ha kane ka sngi u la ong ba U Soso Tham u dei u riew pawkhmat ha ka thoh ka tar ha ka ri uba ki jingtrei jong u ki pynskhem ia ka kolshor jong ka jinglong Khasi.
Haba pynkynmaw ia ki jingshem shimet jong u haba pule ia ki kot ba la rim kum ka Ka Duitara Ksiar bad Ki Sngi Barim u Hynniew Trep, u Myntri u la ong ba kine ki jingthoh kim sahkut ha tang ka kam poitri, hynrei ki la pynim biang ia ka jingkynmaw, ka akor bad ka jingsngew ba jylliew jong ka jaitbynriew Khasi.
Ha kane ka prokram la don ka jingrwai pdiang burom na ka samla Fidelity, kaba dei ka khynnah skul jong ka Memorial Senior Secondary School, bad bud sa ka jingpyni ïa ka jingshad tynrai kaba kyrpang kaba la ai kyrteng “Notun Ashar Vani”, kaba pynïasnoh lang ïa ka jingshad tynrai bad ki khana pateng.
Kum shi bynta jong ka jingrakhe, la sam ruh ïa ki khusnam sha ki nongjop ha ki jingïakob bapher bapher kiba la pynlong ha ka 15 bad 16 tarik u Nohprah, kiba kynthup ïa ka jingïakob thoh bad pule poitri, ki quiz, jingrwai bad ki jingïakob saindur, ba la pynlong da ka Sohra Government College.
Ki khynnah skul na ki jaka pule kum ka St. St. Dominic’s School bad Auxilium Higher ki dei kiwei na ki khynnah kiba la ioh khusnam. Ha kane ka prokram la don lang ki riew pawkhmat, ki riew shemphang, ki nongthoh kot, ki samla pule bad ki briew kiba trei ha ki kam kiba iadei bad ka kolshor kiba la ai burom lang ïa U Soso Tham ia uba la khein kum u Kpa jong ka thoh ka tar Khasi, bad ki kam jong u ki la buh ïa ka nongrim ban pynneh pynsah ïa ka ktien Khasi, ka histori bad ka jinglong kyrpang jong ka kolshor lyngba ka thoh ka tar.
