Shillong, Lber 20: Ka Seng samla pule Khasi Students Union mynta ka sngi 20/Lber/2026 kala rkhie ia ka lyngkhuh dap snem kaba 48 naduh ba la seng ia ka, ia kane ka jingrakhie la pynlong ha u mot sahnam bala tei da ka seng ha ka lai dong ha Lachumiere ha kaba ki dkhot ka seng kila iawan ban ia shim bynta, ba dei ha kum kane ka sngi la seng ia ka KSU ha u snem 1978.
Ha ka jingkren u President ka seng kmie u samla Lambokstarwell Marngar u la ong ba dei ha kum kane ka sngi 48 snem mynshuwa la seng ia ka KSU ym na ki bynta ki kam sngewbha hynrei kum ki samla kila mad ia ki jingjaw snam ki jingtyrha hynrei ka thong ka long ba kum ka jait bynriew kam dei ban shah teh mraw.
Ha ka jingkren u President seng kmie u la ong ba kane ka sngi ka dei ka sngi ba pynkynmaw ia ki khun samla bad khamtam eh ia ki dkhot ka seng ba nangne shakhmat ka jingiaid lynti kaba kumno hynrei dei ban ieng skhem ban ai ka jingshakri ia ka jaitbynriew hapdeng ki jingtynjuh.
Ha kane ka sngi u president u la pynkynmaw ia ki mat bad ki jura kiba ka seng kala ju ia kren bad ka sorkar na ka por sha ka por, kum u pud u sam, ki ain ban iada ia ka jaitbynriew, ka pule ka puthi hynrei kaei kaba ki ioh ka jubab ka long ka jingrung along ki dkhot ka seng na ka por sha ka por.
U nongialam ba ha khmat jong ka seng u la pynpaw ia ka jingsngewkhia ba lada lap miet tang ha ka jingiakdew kti kan poi ka por ba ka jaitbynriew kan sa shah klun bad shah synshar ha kiwei ki jaitbynriew u khot u wer ia ki para samla lada ki iohi ia ki jingma kiba lah ban ktah ia ka jaitbynriew to leh iala ka kamram ban iada bad ha kane ka jingialeh ym dei ban liem noh ha ka thma pyrkhat lada liem noh ha ka thma pyrkhat ka jingjop kala ap lypa ia kiwei ki jaitbynriew.
Ha kane ka sngi la ioh ruh ia ka jingkren na u General Secretary ka seng u samla Donal V Thabah, ha kane ka sngi ki nongialam ka seng na kylleng ka ri lum khasi kila ia don lang ban rakhe kyrpang ia kane ka sngi.
