Shillong, Nailar 30: U Bah Charles Pyngrope President ka Trinamool Congress (TMC) u la ong ba kum ka seng ka phai khmat sha u MLA barim ka Umroi constituency u Bah George B Lyngdoh ban long kum u kyrtong ka party ban iakhun ha ka elekshon MP-Lok Sabha na Shillong Parliamentary seat ka ban long ha u snem 2024.
Haba iakren bad ki nongthoh khubor na ka liang u bah Charles Pyngrope u la pynpaw ba ma u shimet hi, u sngew u Bah George B Lyngdoh u dei u kyrtong u ba biang eh hynrei ka party kan sa shong bishar bniah halor ki kam ba iadei bad ka elekshon MP-Lok Sabha 2024.
U bah Charles Pyngrope u MLA ka TMC na Nongthymmai ula pyntip ba haduh mynta, ka Party kam pat shim satia ia kano kano ka rai halor ka kam elekshon MP-Lok Sabha hynrei kum ka party kan sei kyrtong na baroh artylli ki parliamentary seat-ka Shillong bad Tura parliamentary seat.
U la ong ba, u la dep ban iakren bad u General Secretary ka TMC ba khmih ia ka Meghalaya Manas Bhunia bad la pan por ban iakynduh ban iakren kham bha la kan long ha Shillong ne hap ban leit nga sha Kolkata.
Haba jubab ia ki jingkylli, u Bah Charles Pyngrope u la ong ba ia ka Shillong parliamentary seat hi, u kwah ban pyniakhun ia u Bah George B Lyngdoh hynrei ia ka Tura parliamentary seat, u ieh ha ka jingstad u nongialam ka TMC parliamentary party Dr Mukul Sangma ban leh ia kaba donkam.
