Shillong, Iaiong 01: Ka Confederation of Ri Bhoi People (CoRP) hapoh ka jingialam u General Secratary bah Markus Makri bad u Vice President bah Juban Swer lem ki dkot ka seng hynne ka sngi Balang 1 tarik Iaiong ki la iakynduh ïa u Deputy Commissioner, Ri-Bhoi District ban pynsngew halor ki jingeh ki briew ba don jingduna dkhot met ki kynduh hapoh ka District.
Ha kane ka jingïakynduh ia u DC, ka CORP ka la ai ruh da ka jingthoh sha u DC halor bun ki mat, kynthup ïa ka jingbym biang ki lad jingïarap na ki skhim sorkar bad ka jingbym biang ki jingshna ia ki lynti iaid ha ki ophis sorkar, hospital bad ki skul kumba long kiwei ki ophis sorkar ha jylla.
Ki nongïalam ka CORP ki la pynpaw ba donkam jingïatreilang bad ka sorkar ban pynthikna ba ki briew ba don jingduna ha ka District, kin ïoh ia ki hok jingiarap na ki skhim sorkar bapher bapher kumba long ha kiwei ki District.
Na ka liang u DC, ula pynpaw ka jingsngewnguh ïa ki nongialam ka CORP bad ula kular ban peit bniah ïa ki mat jingdawa ka seng bad ban shimkhia ia ki lad jingïarap ïa ki briew ba don jingduna ki dei hok ban ioh ha ka district bad ula pynpaw ban ïatreilang na bynta ka bha ka miat ki paidbah ka them Ri-Bhoi.
