Shillong, Nailur 02: Ka Employment Monitoring Cell jong ka Khasi Students’ Union mynne ka sngi ka la ioh ban kynduh ia ka District Medical & Health Officer (DMHO) ka East Khasi Hills District ban ujor halor ka jingkynrum kynram ka jingpynlong eksamin thung kam ha ka district na bynta ka AYUSH Hospital kaba hap hapoh ka National Ayush Mission (NAM).
Ka District Ayush Society (DAS) ka lah pynlait paidbah ia ki post bapher bapher ha 13 tarik u Rymphang, 2024. Hadien ba ki samla ka jylla ki lah dep apply ia kine ki post bapher bapher, la pynlong ia ki eksamin na ka bynta kine ki post naduh u bnai Jymmang bad ia ki resot dang shu dep mih ha kine ki sngi.
Ka Seng ka dap da ka jinglynngoh hadien ba ka iohi ia ka resot jong ka District Programme Manager. Na ka bynta kane ka post District Programme Manager ha East Khasi Hills la pynlait tang kawei ka post, ladon 20 ngut kiba lah apply bad tang kine ki 20 ngut hi ba lah bit ban thoh ia ka eksamin ba lah pynlong ha 29 tarik u Jylliew, 2024.
Katkum ka Notification ba lah pynlait na ka office jong ka DHMO. Hynrei ha ka por ba pynmih ia ka resot jong kane ka eksamin la lap ba na ki 5 (san) ngut ba lah pass ia ka eksamin ban ialeh ia ka document verification ne ka personal interview, don ar ngut na kita ki 5 bym shim lah mih kyrteng hapdeng kita ki 20 ngut ba lah pynlait katkum ka notification jong ka office DMHO.
Kane ka pynsuba ia ka Seng bad ki paidbah baroh hi ba ka don eiei sha lyndet ba mih kyrteng jong ki briew ki bym shim la apply ia ka kam, bym shim lah don kyrteng ha ka list jong kita ki 20 ngut, hynrei la paw kyrteng pat ban ialeh ia ka document verification.
Ka Seng ka lah pan jingpynshai na ka DMHO kaba dei ruh ka Member Secretary hapoh ka District Ayush Society, EKH. Na ka liang ka DMHO ka lah pyntip ba lah thung ia u Nodal Officer ba kyrpang ban peit halor ka jingthung kam bad ka jingleh eksamin bad ka kam shim tip bniah halor kane ka bynta hynrei ka lah kular ba kan wad bniah halor kane ka bynta bad yn sa pyntip bad pynshai ia ka Seng lashai ka sngi.
Ka Seng ka ju lap na ka por sha ka por ia kum kine ki jingthurmur ha ki jingthung kam ha ki post bapher bapher. Ka jingsuba na ka liang ki paidbah ha kine ki sngi ki long ka jingthung kam hapoh ka jylla kam shim long kaba khuid hynrei ka long tang na bynta ki khun ki kti ki longheh longhaiñ.
Ka Seng ka kwah ban ban jur ba kum kine ki jingthung kam kaba bym khuid kan dang iai jia katba ka Sorkar kam pat shim pyntreikam ia 20 tylli ki mat jingdawa jong ka Seng ba lah buh na bynta ka MPSC.
Kine ki mat kim dei tang na bynta ka MPSC hynrei ia baroh ki tnad treikam jong ka Sorkar jylla baroh kawei bad lada pynurlong lut ia kine ki mat ka Seng ka ngeit ba kan wanrah shibun ia ka jingkhuid ha ka thungkam ha ki tnad sorkar bad kan pyrkhing ia kino kino ki ba mut leh tuh.
Ka Seng ka bitar ruh ba wat lada katto katne ki MLA ka jylla ki lah iakren ha ka Dorbar thaw aiñ ba ladep halor ki mat ban wanrah ia ka jingthung kam kaba khuid hynrei ym shim iohi ia kano kano ka resolution kaba pura halor kane ka bynta bad kiei kiei baroh ki sah tang ha ka jingiakren.
Ka Seng ka maham jur ia ka Sorkar ba lada ka Sorkar ka sngap jar halor ki 20 tylli ki mat jingdawa jong ka Seng, ka Seng ha ki sngi ki ban wan kan wanrah ia ki jingiakhih bapher bapher.
