Shillong, Iaing 26: Mynta ka sngi ka South West Khasi Hills District kala leit ban ia kynduh ia ka myntri ka koit ka khiah ka kong Ampareen Lyngdoh ban ia kren halor ki lat jingsumar kiba dang don shibun ki jingduna hapoh ka South West Khasi Hills District bad kiba hap hapoh jong ka Mawsynram Community bad Rural Development Block.
U President ka seng u samla Forwardman Nongrem haba kren ha ki lat pathai khubor ha dien ka jingiakynduh ia ka myntri la ong ba ka phang kaba nyngkong, k jingiakren halor ka hospital kaba shispah jingthiah ha Mawkyrwat, ia kane ka CHC la plie ha ka 22 Nohprah 2022 hynrei ka dang duna bun ki bynta.
Ki jingduna ki long kum ki kor ban pyndon kam ha ka ICU, ki nongtrei bad bun kiwei kiwei ki jingduna ruh ki kali Ambulance bad ki kam kiba dang hap ban ioh ia ka jingmynjur jong ka sorkar ia kine la pynsngew sha ka myntri mynta ka sngi.
Kawei pat ka phang kaba ki la ia kren mynta ka sngi ka long halor ka jingdon kam ban don noh ia ka ophis la ka jong District Medical Health Ophisr hapoh ka District, ia mynta kila pyndon kam ia ki jaka sah jong ki doctor ban long ka ophis jong ka DMHO, ka seng kala pan Doktor sa wei bad kawei ka Ambulance hapoh ka PHC ha Wahkaji.
Hapoh jong ka South West Health Khasi Hills District ki don ar tylli ki Dispensary ia ki iing la dep ban shna hynrei haduh mynta ka sorkar kam pat ai jingmynjur ban thung kam ban trei ha kitei ki ar tylli ki jaka ai jingsumar, kawei ha Mawthong bad kawei ha Mawkyrwat.
Haba ia dei bad ka Mawsynram C&RD Block, kila ia kren ia ki jingdon kam hapoh ka Mawsynram CHC kaba peit ia ki shnogn baroh kiba hap hpoh katei ka block hynrei kam don ia ki kor ki bor kum ka Ultrasound bad kiwei kiwei ki kor ki bor, ka don kam ruh ban pynbha bad ban ai rong kum juh bad la pan ruh ia ka Dispensary ha shnong Mawhiang bad shnong Jyllep.
Ha kane ka jingiakren la dawa na ka tnad ka koit ka khiah ban pynkiew noh ia Danger PHC sha ka CHC bad ha kane ka jingiakren ka myntri kala kular ban leh ei ei ka jingdon kam ia ki Ambulance bad ka Hospital ba 100 jingthiah bad kala ong ba kan sa pynsngew ia kane ha ka sorkar bad kin sa kynduh biang ha dien ar taiew.
