Shillong, Lber 20: Mynta ka sngi ka 20/Lber/2026 u myntri rangbah ka jylla u Conrad K. Sangma u la ia kynduh ia ka samla Sanfida Nongrum kaba la mih khmat ia ka Ri India ha ka jingialehkai Asian Football Confedaration na ka kynhun ialehkai ka Indian Senior Women’s National Football.
Ha kane ka jingialeit ialehkai kaba la long ha ka Ri Australia ha une u bnai ba la dep ka samla Sanfida Nongrum kala thep ia ka kol kaba nyngkong na ka bynta ka Ri India ha katei ka jingialehkai jong ka dewbah Asia bad kane kala rah ia ka nam ka burom ka jylla.
Mynta ka sngi u myntri rangbah u la ai ia ka jingnoh synniang sha ka samla Sanfida da ka pisa kum ka dak ban ai mynsiem bad ka jingburom ia ka namar kala long ka nuksa ia ki para samla ba kin don ia ka mynsiem ban kiew shakhmat ha ki jingialehkai bad kiwei kiwei ki kam de.
Ka samla sanfida ha ka jingkren ka jong ka kala ai khublei ia u myntri rangbah ka jylla u ba la ai ia ka jingiarap kaba ka khlem poi pyrkhat ba kan ioh ia kane ka jingithuh na ka sorkar, kumjuh ka jingkyrshan na ki paidbah ka jylla ha kajuh ka por ka kyntu ia ki para samla haba ki leh ia kano kano ka kam ka dei ban don ia ka thong bad trei shitom ban poi sha kaba thmu.
