Shillong, Lber 18: Ba duna Doctor Specialist ha West Khasi Hills, kynduh ki nongialam ka HANM West Khasi Hills ia ka Myntri ka Koit ka khiah.
Ka Hynñiewtrep Achik National Movement (HANM) West Khasi Hills ha ryngkat ki nongialam jong ka Seng Kmie ha ka 18 tarik Lber 2024 ki la leit iakynduh ia ka Myntri Ka tnad ka Koit ka khiah ka Dr Mazel Ampareen Lyngdoh halor ka jingduna ki Doctor Specialist ha ka thain West Khasi Hills.
Haba kren sha ki lad pathai khubor na ka liang U Bah Gabriel Sohlang u la ong ka jingwan kynduh ia ka Myntri ka tnad ka koit ka khiah ka dei halor ka jingduna ki Doctor Specialist ha thain West khasi Hills.
U la ong ka jingbym biang ki Doctor Specialist ka la pynlong ia ki paidbah khamtam ia ki ba wan na ka longing ba duk ki hap ban wan sumar sha shillong bad kumjuh ruh sha Guwahati kane ka wanrah jingeh ia ki baduk.
Shuh shuh u la ong hadien ka jingiakynduh bad ka Myntri ka tnad ka koit ka khiah na ka liang ka Seng ka pynpaw ia ka jingsngewkmen na ka Myntri ka tnad ka koit ka khiah ka kloi ban iasnohkti lang ia ka jingdonkam ki paidbah ha West Khasi hills.
Na ka liang ka Dr Ampareen lyngdoh ka la pynsngew na ka por sha ka por ka sorkar ka khot ban thep kam hynrei , ki doctor kiba trei shabar kim kwah ban wan trei shuh sha jylla lajong.
Ka Seng ka kyntu ia ki doctor Specialist ba kin sngewbha ban wan trei bad ban shakri ïa ki paidbah jong ka Jylla khnang ba kan ai jingmyntoi khamtam ïa kiba duk ba suk.
Ka Seng ka la aiti da ka dorkhas sha ka Myntri ka tnad ka koit ka khiah ban buh ïa u Orthopaedic Surgeon, Radiologist, Oncologist, Biochemist, Pathologist, Psychiatrist, Obstetrician & Gynaecologist bad Paediatrician.
