Shillong, Nailar 06: Ka Synjuk ki khlieh nongsynshar shnong jong ka Mawsynram hynne ka sngi ka 6 tarik Nailar ki la wan iakynduh ia u Myntri Rangbah ka Sorkar jylla u Conrad K Sangma haba iadei bad ka jingsahteng ban kyntiew kyrdan noh ia ka Block Mawsynram sha ka Civil Sub division.
Haba kren bad ki nongthoh khubor u Chairman ka Synjuk ki khlieh nongsynshar Shnong u H Rapsang u la pyntip ba kane ka dei ka mat kaba la slem bha bad ban kyntiew kyrdan ia ka Mawsynram Block sha ka Civil Sub division.
U la ong kane ka dei ka mat jingdawa kaba la slem bha bad ka la poi sha ki 20 snem tam halor ka jingdawa ban kyntiew kyrdan noh ia Mawsynram Block sha ka Civil sub Division.
Shuh shuh u la ong ka jingwan kynduh ia u Myntri Rangbah mynta ka long ban pynkynmaw biang ia ka jingdawa civil sub division da ki khlieh nongsynshar shnong jong Mawsynram C & R D Block.
U la bynrap shibun ki jingeh haba iadei bad ka jingjngai na Mawsynram sha Shillong ka long kumba 60 km ei ei bad shaduh ki thain border ka la poi kumba 120, 130 km bad ki paidbah ki hap wan shaduh shillong.
Haba iadei bad ka jingkoit jingkhiah bad ka jingdonkam ha ki ophis sorkar bad kiwei kiwei ka buh jingeh ia ki paidbah bad ki la pynsngew ha u Myntri Rangbah haba iadei bad ka jingkynduh jingeh ki paidbah haba iadei bad ka jingbym don ia ka Civil Sub Division.
Ka Mawsynram ka dei kawei ka jaka kaba jur slap tam bad ka wanrah ia ka jingjot ruh ka ba bun tam khamtam ha ka leit ka wan ne ka leit iew leit hat bad ha kiwei kiwei ki kam. Kumta ki dawa ban kyntiew kyrdan noh ban wanrah ia ki shibun ki kam pynroi bad ki jingmyntoi ia ka thain Mawsynram baroh kawei.
la iathuh ba kane ka jingiakynduh na ka liang u Myntri Rangbah u la pyntip ba un dang bishar bniah bad ka kynhun myntri haba iadei bad ka jingkyntiew kyrdan ia ka Mawsynram Block sha ka Civil Sub Division.
