Shillong, Iaiong 09: Ka Synjuk ki samla Shnong jong ka Byrnihat haryngkat ka jingsynrang u rangbah shnong jong ka Pilangkata u bah Besterfield Shylla bad u bah BB Makdoh u ba dei u Chairman jong ka synjuk ki Rangbah Shnong Ri bhoi District, mynta ka sngi ka 9 tarik u Iaiong 2024 ki la leit ban ia kynduh ia u CEM ka KHADC u bah Pyniaid Singh Syiem bad kumjuh ruh ia u Syiem ka Hima Myllien u Paim Ainam Manik Syiem.
Kane ka jingleit ia kynduh ka long namar ka jingkwah long rangbah Shnong jong ki Garo ki ba shong ba buhai shnong ha poh ka them Ri bhoi khamtam ha ki Khappud jong ka Meghalaya bad Assam.
Ha kane ka jingia kynduh bad u CEM ka KHADC bad u Syiem ka Hima Mylliem na ka liang kine ki Seng Samla ki la pynpaw ka jingpyrshah ka ba jur ia kane ka jingdaw jong kine ki jaidbynriew Garo ba kin ioh ban long Rangbah Shnong ha kine ki Thain.
Ha ba ioh ban kren bad ki nongthoh khubor na ka liang u bah Kitbor Suting u ba dei u Chairman u la ong ba kane ka jingwan ban ia kynduh ia u CEM ka KHADC bad ia u Syiem ka Hima Mylliem ha ka ba naka liang u CEM u bah Pyniaid u la ai ka jingpynshai ba kine ki jaid bynriew Garo kin ymlah satai ban long ki rangbah shnong ha kine ki shnong bad na ka liang u CEM u la ongruh ba ka Hima Mylliem ka la don la ka jongka ain.
U bah Suting u la ong ruh ba ha ka jingiakynduh ia u Syiem ka Hima Mylliem na ka liang u Paim u la pynpaw ba kindei ki khasi ki ban lah ban long ki Rangbah Shnong ha kine ki jak aba hap hapoh ka jingpeit jingkhmieh ka hima Mylliem.
U la ai ruh ka jingkhubei ia ka jingshim khia ka Hima Mylliem bad ka District Council ha ka ba shen kin sa khot ia ka jingia kynduh lang jong kine baroh ki nongsynshar shnong ki ba don ha poh ka them Ribhoi ban ia kren halor kane ka bynta ha kine ki khyndiat sngi ki ban sawan.
Na ka liang u CEM u la ong ba ka kane ka jingdawa jong kine ki rangbah shnong ki ba dei ki Garo ka long ka ba pyrshah ia ka riti synshar jong ka District council bad kumjuh ruh ia ka Hima Mylliem.
Na ka liang u CEM u la kular ba ha kine ki khyndiat sngi ki ban sawan ha dien jong ka Election MP na ka liang jong u ha ryngkat ka Hima Mylliem kin sa ioh ban ia kynduh lang ban ia thir ia ka jingeh jong kine ki nongshong shnong bad kumjuh ruh ia ka jing dawa jong kine ki paid Garo.
Kum ban shu pynkynmaw ba kane ka jingdawa ka la wan ha dien ba ki nong ialam jong ka All Ribhoi Garo Headman Association bad ka All Khasi Hills Achick Federation ki la dawa ba dei ban ailad ia ki paid Garo ba kin ioh ban long ki Rangbah Shnong ha rilum Khasi.
Katei ka kynhun dangshen ruh ki la ioh ban leit ban ia kynduh ruh ia u Myntri rangbah ka Jylla U Conrad Sangma ha ka 7tarik u bnai Lber 2024 da ka jingkyrpad ba ynshim khialem ia kane ka jingdawa jong ki.
