Shillong, Iaiong 04: U bah Adelbert Nongrum u MLA ka North Shillong Constituency u la leit ban iakynduh ia u Chairman ka MIDC u James K Sangma ban pan jingshai halor ka jingkynnoh ba ka don ka jingthid jaka ka MIDC ha Ri-bhoi District.
U bah Adelbert Nongrum haba kren bad ki nongthoh khubor u la ong ba ha ki khyndiat sngi ka la don ka khubor ba pypaw ba ka Meghalaya Industrial Development Corporation ka la thid jaka ha Ri-bhoi kaba la pynlong ruh ia ka Confederation of Ribhoi People ban mih shakhmat ban pyrshah ia kane.
U bah Adelbert Nongrum u la iathuh ba ha ka jingiakynduh bad u James K Sangma ban pan jingshai ia kane, u la ong ba na ka liang u Chairman ka MIDC u la pynpaw ba kam shym la don kata ka jingkynnoh. U la ong ruh ba kane ka dang dei ka bynta ba sdang ba u buddien haba iadei bad kane ka kam lyngba ka lynti ka ba dei kaba um kwah ban ialam bakla ia ki paidbah bad ialade.
“Ka khyndew ka shyiap ka dei ka jingim, lada ia ka hok ngi shah knih noh te kaei pat ba ngin pynkyrmen ia ka lawei” u la ong ba dei halor kata ka nongrim ba u bah Adelbert Nongrum u la budien ia kane ka kam kaba ktah ia ka jaitbynriew Hynñiewtrep.
U la ong ba ha kane ka jingiakynduh ka dei tang ka jingpan jingshai ba shu iakren khlem da don kano ka jingai jingthoh bad u la pynpaw ruh ka jingai khublei ia ka senga CoRP kaba la peit pyrman ia kane bad bakan dang bteng ruh ban iaibudien halor kane ka kam nangne shakhmat.
