Shillong, Risaw 12: Ka Employment Monitoring Cell jong ka Khasi Students’ Union ha 9 tarik u Risaw, 2024 ka la buh ia ka jingujor ha khmat u Director jong ka Directorate of Arts & Culture, Govt of Meghalaya halor ka jingpynlait ia kawei ka post jong Guitar Instructors ha ka State Institute of Arts & Culture.
Katkum ka jingpynlait khubor (advertisement) la pyni ba kane ka post ka dei sha ka bhah jong Garo category hynrei ka dei ban leit sha Khasi-Jaintia category.
Katkum ka jinglum khubor na ka liang jong ka Seng, la tip ba ha ka Institute of Arts & Culture don 2 tylli ki post jong Guitar Instructor bad uwei na kita ki nonghikai (instructor) u dei u Khasi bad uwei pat u Garo.
La advertise ia kane ka 1 post ha ka 19.09.2024 namar la shongthait uwei na ki Guitar Instructor uba dei Khasi. Te katkum ka jinglong jingman jong ka Reservation Policy, ia kane ka post ba dang advertise mynta ladei ban ai sha KJ category bad ym dei ban leit sha ka Garo category.
Hadien ba la iakren bad u Director bad ki staff jong ka Arts & Culture, ki la batai ba ki ioh ia ka jingbthah na ka Personnel & AR Department halor kane bad kum ka Directorate kam don bor halor kane ka bynta.
Ynda lah tohkit bha, ka Seng ka lap ba ia ka roster la pynkulmar na ka liang kane ka Department ha kaba ia u Garo ba la ioh kam ha u snem 2007 la pynrung ha KJ category ha ka roster ka ba long kaei kaei kaba bakla shibun.
Bad mynta ba dei ka pali bad advertise biang, ka la kulmar namar ka ladei ban ai bhah sa sha u Garo hynrei u Garo u ladon lypa ha KJ category te ka lah noh shiliang ka bhah ha kaba la leit lut 100% sha u Garo.
Kane ka jingleh lyndet jong ka Sorkar bad ka Personnel & AR Department ka la thok bad shukor ia ki paidbah Khasi Jaintia namar katkum ka jingiakren bad ka soskular kaba la ai na ka liang jong ka Sorkar ki batai ba ia ka roster yn ym pyntreikam lyndet ne ban phai biang shadien (retrospective) hynrei kan iaid beit shakhmat (prospective).
Na ka liang jong ka Seng kan nym ailad ba ka bhah ba dei hok ban ioh u paid Khasi, yn pynduh pyndam noh da kaba lehbor ki katto katne ngut ki briew ba don ha ka Sorkar.
Ka Seng ka dang ap ban ioh ia ka jubab (official reply) na ka Directorate of Arts & Culture bad ha kine ki sngi ban wan kan sa kynduh ruh ia ka Personnel & AR Department ba pynbeit halor kine ki jingkynrum kynram, la ong u samla Reuben Najiar Chairman Employment Monitoring Cell Khasi Students’ Union.
