Shillong, Jymmang 25: Ka sorkar jylla kala pynlait ban ia dei ia thied ia u synsar bad ia u sla tyrpat kaba ki briew jong ka jylla ki iarep iariang. Ka jingiakhaii ruh kala sdang ha Mawiong mynta la baroh artaiew ei ei hynrei mynta ka sngi ki Marwari kiba thied ia kitei ki ar jaid ki marrep kila sangeh da kaba ai daw ba kim treh thied shuh namar ba ka KHADC ka phah shim ia ki “Transit Pass”.
Ki nongkhaii synsar bad sla tyrpad na Khasi Hills bad Ri Bhoi District kiba la poi ha Mawiong mynta ka sngi kila ia kynduh ia ka jingeh ha kaba kim ioh ban pynhap ia u sla tyrpat bad u synsar namar ba ki nongkhaii kim treh thied shuh namar ba ka KHADC ka ong ba hap ban shitm TP kaba shong dor T.4500/- tyngka shi kali.
Ka jingbym ia sngewthuh ka long ba ka sorkar jylla kala dep ban pynbna paidbah lyngba ka ka thnad rep ba ia u synsar, sla tyrpat bad ia u sohmarit la ithuh kum u ki marrep, da kane ka jingithuh jong ka sorkar ka long ba ki nongkhaii ban kit sha bar ka jylla kim don kam shuh ia ka TP.
Haba ia dei bad kane ka jingeh kaba ki nongrep ki ai kynduh u MDC jong ka Mawhati u bah Charles Marngar ryngkat bad ka kynhun ka seng ki Nongkhaii Marrep kila leit ban ia kynduh ia u CEM jong ka KHADC u Bah Titosstarwell Chyne bad ha kane ka jingiakynduh na ka liang jong u CEM jong ka KHADC u la kular ban khot ia ka jingialang la shai ka sngi ban ia pynbeit ia kane ka jingeh.
